› 選擇地區
三藩市
紐約
洛杉磯
其他美國地區
香港 台灣 北美
 
2018年05月29日

操盤手札記:天口㷫的時令股 - 割柑人

世界盃將至,投資時令股,首選啤酒股。 資料圖片

禮拜五就踏入6月,呢個月有幾個大日子:6月1日A股入摩、6月2日美國商務部長訪華,6月12日美朝𥧌會、6月14日美國議息揭盅,同日加映世界盃揭幕!A股入摩,肯定對A股有利,但H股比重將被攤薄,對港股有辣有唔辣。
中美貿易談判同美朝核武談判,唔係見個面就傾掂。特朗普指示商務部放生中興(763),但未必過到國會,特朗普同國會之間,比《宮心計之深宮計》更攻心計。至於美朝𥧌會,金正恩同特朗普更鬥演川劇變臉。呢兩單談判,隨時玩到股市氹氹轉。
美國6月加息幾成定局,但上周公佈嘅會議紀錄放鴿,市場估計6月加息之後,9月再加多次,今年就mission complete。本來加息預期降溫,美匯指數回吐;不過,西班牙、意大利、土耳其政局不穩,當地債息急升,資金避險回流美國,美匯指數升破94,美國債息跌破升軌。
土耳其喺下月總統大選前里拉大跌,情況就如早前俄羅斯總統大選前盧布大跌,似係西方搞鬼。睇嚟土耳其、俄羅斯、伊朗連成一線,先係死因。大國混戰,唔止喺政治、經濟層面,仲喺體育層面。體壇盛事世界盃就快開波;不過,市場就擔心「世界盃魔咒」再現。
世界盃期間跌市居多,其實唔關世界盃事。咁關咩事?咪美國總統大選囉!兩者都係四年一度,世界盃舉行嗰年,一定係美國總統上任第二年,通常股市都會差啲,皆因新官上任會振興經濟,第二年會加息,為第三年減息製造條件,為連任鋪路。當然「六絕」亦有關係啦!
近排天口㷫,南生圍會悶燒,馬時亨會扯火。下火有時令食品,投資亦有時令股。天時暑熱睇世界盃,梗要啤啤佢!據淘寶資料,喺上屆世界盃,6月啤酒交易量按月增加5倍,按年更增加10倍。華潤啤酒(291)呈區域突破,青島啤酒(168)呈三重底突破,不妨諗諗。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載