› 選擇地區
三藩市
紐約
洛杉磯
其他美國地區
香港 台灣 北美
 
2018年05月31日

冰說聰明:岳少財技股東怕怕 - 青冰

08年豐德麗被對沖基金狙擊,岳少(林建岳)都有辦法令對沖基金敗走,的確唔簡單。資料圖片

麗展(488)宣佈以1.30元全購豐德麗(571),出價比公佈前股價有折讓,不少傳媒都將通告搬字過紙,話麗展會動用12億元全購,並維持豐德麗的上市地位云云。但似乎忘了個重點,就係邊有人會沽畀佢,以1.30元計,比NAV折讓八成,雖然麗新系形象較差,長期折讓,市價已經算殘,但用一個比殘價更低的價錢,按理唔會有股東咁傻,但岳少搵晒投行搞全購,都唔少錢喎,所以係有古仔的。
麗新系股權架構複雜,財技又多,近年多番重組,目的都係想以垂直式控股,現時麗國(191)持53%麗展,麗展持37%豐德麗,豐德麗持51%麗豐,由此看出,只有麗展揸豐德麗唔夠5成,麗展只能當豐德麗係聯營公司。如持股過半,就可以當係附屬公司,將豐德麗財表併入麗展,整靚條數,融資做嘢就更易。
回到老問題,邊個會咁蝕底沽畀麗展?提提你,豐德麗在去年2月曾以0.62配售2.48億股,當時市場已經問,唔等錢使配嚟做咩呀?15個月後的今天,似乎找到答案,以1.3元計,這些獨立股東已經賺一倍,全購通告講得啱架,豐德麗成交長期低迷,全購係給股東一個上佳的退場機會。現時麗展持5.5億股豐德麗,只要股東沽兩億股畀佢,持股就可以過半了,咁賺一倍的股東應該識做啦。
08年豐德麗被對沖基金狙擊,岳少配股予股壇高手莊友堅等人,最後基金告上法庭後敗走,對沖基金都咁,普通股民點會唔怕怕,折讓有因啊。麗展係港股通標的,吸引北水都係改善大折讓的好方法,但青冰在搵料時,發現麗展去年參與國內知名網站的論壇,前景講到非常秀麗,但最有趣的是問答環節,提問者寥寥可數,最後搞到主持人要幫手發問,再睇吓CCASS資料,現時北水持有約八萬股,換言之大媽都怕咗你,折讓幾多都唔買,看來岳少要再諗計喇。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載