› 選擇地區
三藩市
紐約
洛杉磯
其他美國地區
香港 台灣 北美
 
2018年06月06日

財女手筆:港鐵上蓋起公屋係咁解 - Melody

鐵路上蓋地皮,是近年大量私樓嘅主力供應。資料圖片

噚日突然傳出政府要求港鐵(066)喺鐵路上蓋撥出部份土地興建公屋,雖然特首已經即刻出嚟澄清話並無其事。不過空穴來風,未必無因。暫且唔理相關政策建議會否落實,呢個建議帶出背後訊息其實好值得探討:政府好可能要搶地起公屋。

香港寸金尺土,本身搵地起樓已經非常困難。政府除咗要大力增加私人住宅土地供應以壓抑樓價外;公屋輪候冊長期有廿幾萬人等緊上樓,每年要劃出若干土地起公屋回應低下階層嘅住屋需要。仲未計重建置業階梯嘅居屋同綠置居,又話要搵地起青年宿舍。香港土地供應本身就不足,私樓公屋居屋綠置居其實從頭到尾都係處於互相競爭土地嘅狀態,同一幅地拎黎起公屋,無可避免起私樓或者其他種類住宅嘅土地會減少。

近幾年政府大力加推土地起私樓,喺供應層面着手,大力增加供應,希望可以壓低樓價,其中供應主力就喺各條新落成嘅鐵路上蓋。呢啲上蓋地皮幅幅都有番咁上下大,供應伙數基本以過千單位起跳。如果無咗呢個供應主力,過去幾年私樓落成量會大跌,而樓價應該唔只今日嘅價錢。𠵱家吹風話要用本身起私樓嘅鐵路上蓋去起公屋,其實潛台詞即係講畀大家聽,政府已經無辦法喺短時間搵到額外更多嘅土地去應付咁龐大嘅低下階層嘅住屋需要。鐵路上蓋可以即食(即時起樓),唯有用住先,而起私樓嘅土地少咗無所謂,起細些少,起多幾間納米樓,供應伙數照樣可以達標。

喺公屋、居屋同綠置居搶奪土地嘅背景下,私樓未來土地供應有限。係私樓土地供應不足下,政府為達成供應目標,會繼續容忍納米樓出現,正常兩房400尺嘅單位喺可見將來好可能會變成稀有產物。物以罕為貴,搶樓情境會繼續,尤其係正常嘅2房同3房單位。

Melody
http://Fb.com/whichroad

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載