› 選擇地區
三藩市
紐約
洛杉磯
其他美國地區
香港 台灣 北美
 
2018年06月06日

Money Walker:外圍陰霾日日有 - El.

貿易戰明顯係美國中期大選前,特朗普自編自導自演以爭取選票嘅劇目。資料圖片

外圍憂慮日日有,投資者早排極擔心新興市場危機,不過眼球之後話咁快已轉移至歐債危機與中美貿易戰。
其實無論歐債危機、貿易戰定新興市場危機,都係經濟強國與弱國之間,於借貸、貿易與貨幣上嘅往來、互動、合作,所衍生出嘅問題或摩擦。全球化進一步推進,令問題浮面越為明顯,各國繼續忽視癥結所在,一味將自由經濟、全球化、市場力量等奉為聖典,國際金融市場永不安寧只會係新常態。散戶只能眼白白睇住不同地緣與政治亂局,不斷干擾全球金融市場氣氛,一單緊接另一單。
貿易戰明顯係美國中期大選前,特朗普自編自導自演以爭取選票嘅劇目,時候一到自會落幕。至於歐債危機,衍生為金融危機嘅機會的確高於貿易戰,但重點係南歐國家債務有歐央行拍心口包底,故短期內失控可能性極微。筆者最擔心嘅外圍威脅,依然係環球多國步向加息,事關以往金融危機發生,源頭都係加息觸發高負債或高槓桿界別出現問題。
聯儲局下周議息,市場繼續糾纏於今年全年加息三次定四次之上,不過筆者認為對加息嘅討論,好快就會演變成出年仲會加到幾多次息、每季加息一次嘅步伐能否延續、中性利率水平係幾多厘,而呢個亦係美匯能否持續現時強勢關鍵。畢竟歐央行與英倫銀行今年底至明年中好可能會加息,倘若美國屆時暫緩加息步伐,歐元與美元兩者之息差,以及英鎊與美元兩者之息差,將會因此收窄,不利美元匯價。

El.
http://fb.com/moneywalkerhk
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載