› 選擇地區
三藩市
紐約
洛杉磯
其他美國地區
香港 台灣 北美
 
2018年06月06日

中環在線:港交所返主場慶上市18周年 - 李華華

港交所嚟到第18個年頭,今年適逢新主席史美倫(右)上任。

港交所(388)每年中都搞上市周年酒會,今年嚟到第18個年頭,適逢新主席史美倫上任,政府又換咗屆,可能新人事新作風,一改往年喺金鐘五星級酒店舉行嘅慣例,今年首次返去港交所主場「金融大會堂」度搞。咁又係,個場裝修之後,容納到700人咁多,又有貝字牆散發藝術感,無謂再益酒店喇。

三個第一次

咁數落,下星期三晚嘅酒會,似乎有三個第一次。首先,係史美倫第一次以主席身份出席;又將會係林鄭月娥第一次以行政長官身份赴會;地點又第一次喺自己主場搞,值得期待喎,唔知到時有冇特別節目呢?
講開又講,噚日香港掛上今年第一個風球,醒起港交所舊年上市周年酒會,直情係8號風球吹到應一應,但港交所都堅持如期進行,希望今年咁多位財金猛人唔使咁頻撲喇。
講到以往咁多年周年酒會,最令人難忘嘅,相信係12周年時,港交所公佈以167億元天價買LME,不過行政總裁李小加此後都多番強調,交易所並非以併購定位嘅公司,相信就難少少再有大刁消息出現喇。
除咗上市周年酒會,港交所下星期二又搞辦人民幣定息及存款論壇,請來各大銀行同指數商講講北向債券通嘅政策突破,李小加要連踩兩日大活動,熊貓眼又要走出來了。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載