› 選擇地區
三藩市
紐約
洛杉磯
其他美國地區
香港 台灣 北美
 
2018年06月06日

收市閒情:富豪的「自製長糧」 - 千頌C

好多富豪搞家族信託基金,以防後人爭產,但時不時有拗撬。圖為鷹君爭產案開審,羅老太羅杜莉君到法庭聽審。 資料圖片

「你要為將來打算吓,做好自己退休保障,呢啲嘢越早搞越好呀!」只要你有接觸過保險人士,你點都會聽過呢句,所以咪連政府都推年金,畀你搞「自製長糧」!
喂!月月唔做嘢有糧出,係咪真係開心先?呢啲嘢,其實好睇人。
一般人,為退休後作保障,就買年金、基金;但非一般嘅有錢人,就要為埋後代籌謀,搞家族信託基金。身家唔係一嘢分晒,而係每個月向遺產承繼人出糧。好似已故船王許愛周,遺產冇直接分派,改由基金管理形式操作,咁孫仔許晉亨,就每個月喺家族信託基金出糧,娶埋李嘉欣,過住富家公子、無憂無慮嘅生活。
係好共產架,點解?因為多數富豪都了解人性!香港人性本Mean,核心價值係「睇人仆X最開心,睇富豪仆X仲開心」,咁樣分家產好處係,一來防止啲子孫唔生性,一次過敗晒副身家俾人笑;二來係,為防自己過身後,子孫為億億聲嘅錢銀你爭我奪丟人現眼,出現溏心風暴「呢度唔係法庭」、「我地法庭見」呢類對白。
設信託基金防爭產
不過,世界點會咁簡單。2006年過身嘅霍英東,留低300億家產,咁大筆數,當然好好分配。遺囑就好「共產」,承繼人每人每月分派「零用錢」,仲會計埋通脹,如果想增加收入?生仔囉!早一兩年就有報道講過,霍啟剛、郭晶晶兩公婆每個月出「阿公數」十幾萬唔多夠使,之後兩公婆要接大陸騷養家。
不過,份遺囑均真到咁,霍家爭產案都避唔到鬧上庭命運,一搞就搞咗幾年,到𠵱家都未真正解決。
再睇埋梅媽,久不久唔夠錢使,就告遺產管理人匯豐信託;然後到今次鷹君爭產,錢銀分好晒,之後羅老太又覺得匯豐信託唔乖。
呢類爭產案搞來搞去,邊個陣營贏咗場官司都好,輸嘅,係一個家族嘅聲譽。真正贏家,除咗係觀眾有得,可以勁食花生外,仲有就係信託基金。佢哋每一場官司,都係對公眾展示信譽嘅機會,「嗱!無論你啲承繼人幾唔生性都好,我都會企硬幫你執行份遺囑架!Trust me!」

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載