蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年06月07日
馬上成為壹會員

中環在線:四叔見股東「崔腔」講笨忍 - 李華華

久未見傳媒嘅四叔昨出席煤氣股東會。

恒基地產(012)主席李兆基(四叔)都有一段時間冇同傳媒傾兩句,最近恒基系嘅上市公司開股東會,四叔都只係見股東,冇見傳媒,但原來小股東同傳媒一樣,好關心89歲嘅四叔,會否仿效90歲超人李嘉誠宣佈退休,佢哋擔心四叔退休,以後公司就唔送紅股呀。

橙汁唔夠派 股東投訴

四叔旗下煤氣(003)噚日舉行股東會,董事林高演扶實四叔入場,見四叔面色紅潤,深灰色西裝入面着住件紅色毛衣,相當醒神。
佢一入場,全場小股東即刻拍爛手掌,去到答問環節,小股東好關心四叔幾時退休,何解?皆因大家都怕四叔退休後,煤氣派息計劃有變,取消十送一紅股。
林高演代答,重申四叔冇計劃退休,派息係由董事會決定,公司一向派息穩定兼送紅股,相信未來都唔會變咁話,話音未落,全場掌聲再起。
但四叔全程冇乜同小股東交流,佢主要負責讀股東會議程,所有提問都由管理層代答,有趣嘅係,四叔嘅鄉音好似越來越濃,不停將「本人」講成崔世安式嘅「笨忍」。
股東會少不免又有人投訴招呼不周,有位女股東就不滿今年少咗兩樽橙汁,質疑煤氣誠意欠奉,管理層即刻解釋,話今年都有橙汁,可能派晒,公司已經準備好餅卡代替咁話。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載