› 選擇地區
三藩市
紐約
洛杉磯
其他美國地區
香港 台灣 北美
 
2018年06月08日

中環在線:曾入稟追3億欠債
玩具大王:已原諒曹貴子 - 李華華

蔡志明

「謎網50」風暴爆發至今超過一年,關鍵人物「醫生」曹貴子仍然行蹤不明。舊年曾經揚言唔會原諒曹貴子嘅「玩具大王」蔡志明,噚日現身並突然放軟口氣,話已經原諒曹貴子,仲已經冇再追佢還欠款。

讚對方孝順仔

蔡志明噚日罕有現身,出席好友朱李月華旗下金利豐(1031)25周年晚宴,被問到有冇原諒曹貴子,佢說「人總會做錯事,我隔一輪就冇事,唔記得啦,嬲得幾多呀!」仲無啦啦讚曹貴子係孝順仔,話佢爸爸已經90幾歲,遲早會返嚟,仲預計曹貴子未來幾個月就會返香港。之前市場就傳,曹貴子一直身在澳洲。
被問到會唔會再出手幫吓曹貴子,蔡志明就話曹貴子事發後已經冇再聯絡佢,「想幫都幫唔到」,但佢有同曹太聯絡,指對方𠵱家生活「OK,幾開心」。
至於蔡志明3月入稟高等法院,向曹貴子追討逾3億元債項,他指已沒有再追曹還款,「我冇嘢㗎喇!」
廉署去年底同證監會聯合調查康宏環球(1019),拘捕4名現任同前高層,但康宏執董、被指係今次調查對象及「謎網50」關鍵人物嘅曹貴子一直未現身。而被指同曹貴子關係千絲萬縷嘅蔡志明,當時接受《蘋果》專訪,澄清唔係幕後金主,又指曹貴子同屋企人曾向佢下跪求救,「話蔡大哥你一定要幫吓貴子」,但蔡拒絕,強調「唔會再心軟」,又說事後曹貴子多次發短訊向佢道歉,「佢猛道歉,但我唔可以原諒佢!」今年3月,蔡志明入稟高等法院追曹貴子3.09億借貸連利息。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載