› 選擇地區
三藩市
紐約
洛杉磯
其他美國地區
香港 台灣 北美
 
2018年06月20日

收市閒情:貿易戰 中國輸喺…… - 千頌C

中興「豬出國際」,令美國有一個大籌碼同中國玩。資料圖片

中美貿易戰再掀戰幔,簡單講呢兩日發展:美國星期六又挑起條筋,向中國總值500億美元進口商品收25%關稅,於是中國就梗係輸人唔輸陣,大喝一句,「你500億,我500億!」。不過,特朗普顯示一幅「我耍你就得,你報復我就嬲!」嘅姿態,竟然晒你冷,「你報仇呀嘛?咁我諗吓罰多你2,500億商品啦啦啦!」今次呢場貿易博弈戰,中國形勢,暫時似乎處於下風。輸喺邊?就喺以下呢三點!

首先,就梗係豬隊友中興(763)!由一開初違反伊朗禁令,然後將自己犯罪紀錄白紙黑字寫低,再俾美國人贓並獲,就已經「豬出國際」。呢單連中國都兜唔到嘅豬事,令美國有一個大籌碼,大條道理撚化你!

6月頭中興同美國先簽原則性協議,取消針對中興嘅制裁;事隔半個月都冇,參議院唔通過,於是又要恢復制裁啦。特朗普大條道理同中國講,「唔係我唔幫你,我幫你幫到出晒面啦,出埋Twitter啦,但𠵱家係參議院唔畀吖嘛。」話分兩頭,特朗普承諾救中興前,佢個女伊萬卡喺中國拎到7個商標。

其二,美朝峰會順行舉行,特朗普同金仔握晒手笑笑口。本來中國就係美朝中間人,亦因為咁,美國於峰會前,就突然收火,仲聲言放生中興。𠵱家,美朝關係史無前例咁好,中國「中間人」角色力量已經無咁大,令中國籌碼又減一個,而特朗普本身冇咩形象可言,玩過橋抽板又如何?你可能會話,北韓都可以反口呀!但你睇特朗普信心十足,就知佢真係傾掂數;而金仔今次大玩微笑外交,好明顯佢真係想脫貧,「年輕人,山長水遠去新加坡,係愛定責任呀?」「係窮呀!」

其三,呢點總括而言,就真係「越強越見鬼」!美國進口中國多,達4,300億美元;至於中國,入口自美國嘅商品相當少,只有1,600億美元!中國想增加美國商品關稅,根本就去到加無可加嘅地步!「唓!我都唔係好多貨出口去你度,你咪加囉。」所以單係商品關稅呢一戰,中國係輸咗。

不過,又唔好忘記,中國真係無咁易認輸,喺服務業方面,中國係逆差;與此同時,中國3萬幾億美元外滙儲備,當中有過萬億係美債。

千頌C

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載