› 選擇地區
三藩市
紐約
洛杉磯
其他美國地區
香港 台灣 北美
 
2018年07月03日

獨家專訪:
鷹君羅啟瑞爆:成員間互相背叛

小時候,年長十二歲的哥哥,抱着在旁瞌睡的羅啟瑞到床上睡覺。另一位哥哥在耍詠春,他興奮地拍手讚「好嘢」。五位哥哥的衣服一個傳一個,彷彿將溫暖傳至最年幼、最受呵護的弟弟,但法庭對陣後,這份愛頓成敗絮。
記者:周家誠 區嘉儀

相關新聞:WhatsApp成呈堂證供

鷹君(041)爭產案經14日在高等法院審訊後,本月終於迎來中場休息,年尾續審。孻仔羅啟瑞經多日審訊,終可以回回氣,檢討打官司以來的得與失。最大感觸,是鷹君成員間的分裂,已走向不能回首的盡頭。「三姐羅慧琦本來好支持我,但開審前突然聯絡不上,最後我哋互相WhatsApp的內容,卻成為呈堂證供!」

重新理解「兄弟情」

發現了這位變節者,羅啟瑞亦重新理解「兄弟情」:「以前佢哋傳啲衫畀我,我以為係佢哋慘,冇衫着,係好錫我嘅。𠵱家睇返,其實係佢哋咁先可以買新衫。」
鷹君案成為傳媒焦點,經一輪審訊,羅啟瑞這天看來消瘦不少,「你以為我辛苦瘦咗,但我冇瘦過!信不信由你,我唔覺得壓力好大,唯一擔心係媽媽。錢對佢嚟講冇意義,地位對佢嚟講冇意義,佢成世人淨係要一樣嘢(兒女孝順)。」
時間回到1960年代。「羅伯」羅鷹石積極發展鷹君事業,妻子杜莉君主理家庭,照料兒女上學放學,噓寒問暖。當時兄弟情亦濃,三哥羅嘉瑞用功讀書,羅啟瑞在旁看着他做功課,看得睏睡着了,哥哥抱弟弟回床上。四哥羅康瑞年幼時熱愛功夫,尤其是詠春,表演與一眾兄弟看時,啟瑞像粉絲般在旁拍手叫「好嘢好嘢」。羅啟瑞不止一次提到當年好仰慕一眾哥哥,「我係盲目嘅,𠵱家睇返就愚蠢。」
羅家出名節儉,即使羅伯生意有成,家訓不改,六兄弟衣服一個傳一個,但羅啟瑞沒有怨言,「我唔覺係舊,總之佢哋唔要就包在我身上,我只會諗,你畀件衫我着真係慘。」後來才發覺原來是兄長衣服不合身,「我細個蠢嘛,點知原來係你唔啱着箒,我以為係你畀我,所以我先咁崇拜你箒,美麗嘅誤會,但錯有錯着啦。」
羅啟瑞80年代在美國哥倫比亞大學畢業後,回鷹君幫手,懂事後開始有自己意見,與三哥屢有爭吵,不過細佬多數容讓大佬,「意見不合咪不合囉,大家折衷之嘛,我咪讓你多啲囉,你做8、我做2,再唔係我做1都得添。」今天同陣營的二哥羅旭瑞當年夥外人狙擊家業,1984年至1990年離家出走,當年「撐爸爸」的羅啟瑞亦有與他爭吵,六年沒有聯絡,「不過𠵱家證明咗,為阿媽都可以行埋一齊。」
今次兄弟炒大鑊的觸發點,是2015年羅嘉瑞要求大仔羅俊謙入鷹君董事局,遭家族成員反對,羅嘉瑞威脅炒家族董事,引起羅老太一方要求家族信託人匯豐增持鷹君抗衡,惟指令失效,法庭上兵戎相見,家庭分裂成兩陣營,兄弟情誼頓時消失。
「絕對係好大遺憾,但我代入爸爸身份,𠵱個家庭如果只係門面上維繫得住,轉頭即刻散到七零八落,呢個係咪佢哋想?爸爸見到呢個子孫,會唔會覺得仔大仔世界,你鍾意想點就點?由你去做?由你去作惡、吸毒、偷呃拐騙都去做?唔得,一定要講清楚,咁樣係錯。鬥你唔贏,你贏咗係另一件事,doesn't matter,但啱嘅一定要講出嚟,如果呢啲暪天過海話啱嘅,係咪世世代代跟佢哋學習係啱呢?」
羅啟瑞願意接受和解,但條件是對方不能提出條件,「所有財產都係媽媽嘅,講條件似乎好難講得過去」,惟不評論對方是否曾經接觸他。他又呼籲理論上無衝突、應中立的羅康瑞應幫手調停,「康瑞你應該同我一齊啦,但點解會企喺𠵱個位置,真係要你(記者)查出嚟。」羅康瑞曾經在庭外表示為正義撐場,羅啟瑞不解,「為正義咪幫阿媽囉,有咩不正義呢?」
羅老太狀告匯豐官司牽涉證人數目眾多,有法律界人士估最快2020年才有結果,羅啟瑞稱已燒錢數千萬元,但尚未過億,「唔好嚇我住啊」,不過一旦輸官司,「咪上訴囉,爭取到底,冇得折衷,唔會同賊折衷。」羅啟瑞發言人其後澄清,沒有說過他們或任何人是賊,那是一個比喻。

相關新聞:提起母親 淚水眼眶打轉

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載