› 選擇地區
三藩市
紐約
洛杉磯
其他美國地區
香港 台灣 北美
 
2018年07月06日

中環在線:貨櫃碼頭上蓋起樓
周梁老公默默推 - 李華華

周明權話喺葵涌貨櫃碼頭上蓋起樓可行性可與填海、填平水塘平排。
資料圖片

香港政府近排係咁搵地起樓,咁多個土地選項入面,葵涌貨櫃碼頭上蓋起樓經常俾人忽視,最先提出呢個建議嘅工程師學會前會長周明權(即係周梁淑怡老公),就同華華講話個建議明明係最可行,但又冇乜人理會,估計喺呢場「覓地世界盃」入面,好難入到決賽。佢形容「社會冇乜興趣」,佢嘅方案只係黑馬,賠率係1賠0.95,周先生真係幽默感十足,賠咁少又點算黑馬呢?不過佢拼勁十足,開咗個facebook page積極推廣。

指8年可完成規劃

周明權噚日重提葵涌貨櫃碼頭上蓋起樓方案係非常可行,直情係可以同填海同埋填平水塘平排,原因係呢三個選項真係製造土地,唔會話好似郊野公園邊陲或高爾夫球場咁,用嚟起樓就冇咗。而上蓋起樓仲有個好處,就係8年可以完成規劃同起樓,而填海可能要搞十幾年,有排等。至於污染、噪音等問題,其實可以用建築同規劃解決。
好多人唔係好知嘅,係周明權原來同林鄭好多年已經相識,不過自從提出呢個碼頭上蓋起樓計劃,就冇同佢講過,「唔應該利用私人關係去推呢個計劃!」所以佢惟有默默地同老友,即係發展局前局長麥齊光一齊推。
可惜嘅係,黃遠輝揸弗嘅土地供應專責小組提出嘅18個選項中,碼頭上蓋起樓竟然只屬概念性質,「我講咗好耐,但原來冇乜人認真睇過。」真係激死!唔知有冇人會跟進吓呢。

李華華
mailto:LiWaWa@AppleDaily.com


LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載