› 選擇地區
三藩市
紐約
洛杉磯
其他美國地區
香港 台灣 北美
 
2018年07月18日

財女手筆:小米入港股通時機 - Melody

小米幾時入到港股通?應該係等市場水喉充足,貿易戰現曙光、市況起動之時。資料圖片

小米(1810)上市風波食到一地花生碎,睇中港鬥法又確實過癮(當然,首先你要無抽到、買到小米,先會識得笑),幾時小米入到港股通?有機會係咁!

港交所之前出盡力搶到小米來港上市,博晒老命盡獻「第一次」:同股不同權、一上市即刻納入恒生綜指……慌死小米炒唔起咁,可惜真係炒唔起,港交所今次真係偷雞唔成蝕渣米!

最近中美貿易戰搞到市況低迷,但係小米呢個名應該可以呃到唔少新資金落場,中港交易所都爭住「割韭菜」(大陸用語,即係想搶新一批散戶嘅資金),雖然,最終俾港交所搶到小米,但係內地話No No No,炒小米嘅新資金係內地嘅,唔畀流出香港!

有內地網民估,話中央唔畀內地人炒香港小米,係要留返資金係大陸,準備買小米中國存托憑證(CDR),仲揶揄港交所,話港交所想「割韭菜」,可惜「如此焦急割韭菜一點都不注意吃相了」、「為給獨角獸留下點韭菜根,滬深交易所真是拼了,連小米都不讓買了」等等。

港交所(388)行政總裁李小加講得好明白,就係交易所始終係商業機構,有各自嘅「小算盤」,可能真係想鎖住資金,唔想香港分一杯羹,幾時小米入到港股通?應該係等市場水喉充足,起碼都係等貿易戰現曙光、市況起動之時。

Melody

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載