› 選擇地區
三藩市
紐約
洛杉磯
其他美國地區
香港 台灣 北美
 
2018年07月18日

收市閒情:美人計中計 - 千頌C

A股由1月底到今日,跌足25%,如果畀小米抽資,A股點算?資料圖片

「美人計」係著名兵書36計第31計,來自春秋末期吳越爭霸戰爭,目標係利用美色,令目標人物終日玩樂不理政事。返到來現代,美人計已成為騙財嘅常見手段。

話說外表斯文嘅阿怡,今日着住一套整齊嘅套裝,「James,錢同埋我一樣,你今日冇,但將會有。你幫我簽咗張單佢啦,倫敦金價可升唔跌,信我啦!」James月入雖然只得萬三,但眼前嘅純金女神係無價,所以就算要佢一炮過拎畢生積蓄,佢都面不改容,「既然你肯做我女朋友,呢度30萬,你幫我投資!仲有你張美容單,我簽埋!」

單就簽咗,James相信自己得米!於是跑去鄉吓個祠堂,搬個大鑼出來,「噹!阿怡做我女朋友啦!」正當佢想拖住阿怡,當佢係獎盃舉起時,阿怡竟然……「我覺得未係時候拖手,媽媽話要結婚先拖得手。」然後……行開了。

呢個時候,突然有個身影走出,「James!呢個女人呃你架!」阿怡聽到James個表哥咁講,眼神,兩個字,心虛!至於James就立時衝去阿怡面前,一心保護自己女人「冇可能!佢係愛我㗎!你知唔知,阿怡有幾好?佢好到佢喺交友App上嘅排名!係最高㗎!」

「你醒吓啦!交友App信得過?你有睇過IG㗎,啲靚女相信唔過㗎!小米(1810)上市價都好貴啦,佢條數好靚咩?唔靚㗎!女人好識化妝㗎!」James唔甘心,「化咩妝啫?小米入到恒生綜指,仲係信心保證!我問過佢富媽媽,佢媽媽都話阿怡好愛我㗎!」

「佢媽話好你就話好,你有冇問過其他人?小米你就只係講恒生綜指?你唔睇埋MSCI?佢第一時間衝出來話唔畀小米入,斷佢米路!呢堆相,有其他苦主提供嘅證據。」表哥一手指向阿怡,「證明佢係一個呃錢嘅女人。」

「你……點解要呃我!」James想喊,呢個時候,阿怡露出本來真面目,「係因為你蠢!我阿媽欠人街數,佢養唔起我,趕我走,我咪搵人養囉!傻仔!」

望主阿怡個背影,James問表哥,「佢阿媽趕佢走,就好似大陸唔畀小米入港股通咁?」「人類係自私嘅,A股由1月底到今日,係咁跌,已跌足25%。如果畀小米抽資,A股點算?更重要係,今次大陸順手公佈埋,『外國公司』都唔可以入港股通,變相同外資講,『我唔受你哋玩呀,過主啦!』一石二鳥。」

James望住佢隻手,一隻連阿怡手仔都冇拖過嘅手,再望一望佢銀行張單,佢只可以攬住個巨鑼痛哭。

至於表哥,離開祠堂之後,「你啱啱啲戲幾好呀!咁就可以飛咗條仔啦!」阿怡拖住「表哥」,「Easy啦!我哋去邊睇戲好呀?」

千頌C
http://fb.com/winbigwok

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載