› 選擇地區
三藩市
紐約
洛杉磯
其他美國地區
香港 台灣 北美
 
2018年07月18日

MyGut者言:美女金融新星賣年金

買年金,保的是長壽風險。 資料圖片

騙徒手法層出不窮。賣金者係咁話:「以投資角度去看,年金計劃的內部回報率約四厘,較現時銀行存款利息吸引得多。」但my gut唔係咁諗。以投資角度看年金,錯!用銀行存款利息比較年金回報率,錯上錯!學者以投資角度批評年金不能對抗通脹,錯錯錯!
以投資角度看年金,就好似以投資角度看倫敦金,結論只會係投資不如投井。唔想投井,我們應該以甚麼角度看倫敦金呢?雖說「唔滾唔知身體好」,無奈「男人唔『保』好易冇」。因為秀色可餐,幫襯美女金融新星買倫敦金,我認為應該首先以保健角度去看。
同樣道理,為怕不得善終,買年金其實應該首先以保險角度去看。試想,你去轉日本買旅遊保會以投資角度看甚麼內部回報率能否對抗通脹嗎?買年金,保的是長壽風險,即是保你臨老有錢過得到世。以保險角度看年金,要問自己有冇以下三個怕:首先,怕唔怕臨老過唔到世?怕的話,怕唔怕年金太貴?唔怕的話,又怕唔怕俾老婆知美女金融新星同你噓寒問暖?
有美女金融新星從良,向我噓寒問暖sell年金。我問新星:「你唔sell你老豆?」我見新星面有難色,再問:「你係咪寧願sell佢人壽保險?」新星一臉尷尬,我繼續話:「廢青靠父幹,最希望死鬼老豆剩低大副身家,所以遺產多多益善嘅怪獸老豆根本對年金興趣不大。」新星恍然大悟:「睇你無產廢老一條,真係唔怕收尾嗰幾年?」我答:「怕,但無產廢老更怕臨老大病一場冇錢睇醫生,死得快時年金冇命享。」
新星聽完,決定賣返倫敦金。

徐家健
美國克林信大學經濟系副教授
http://fb.com/economics3.0/
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載