› 選擇地區
三藩市
紐約
洛杉磯
其他美國地區
香港 台灣 北美
 
2018年07月20日

【政府年金】慈母Angela買年金
「仔女畀少五千幾對佢哋幫助大」

近日政府不斷宣傳「自製長糧」,鼓勵長者退休後為生活打算,推出年金計劃,但政策甫推出即被指杯水車薪,難以作為日後生活的主要開支,又是否屬實?

剛合符年齡認購政府年金的黃婉華(Angela),本身子女已成家立室,並有一定的積蓄,正考慮購入政府年金。她向記者透露,都有考慮由銀行推出的年金計劃:「私人公司都不斷推類似產品,但風險始終都係高,對於我嚟講,年金計劃都算係一個德政。」

根據Angela每月預算開支(見表),她表示,現時水電煤及住屋開支來自子女家用,而醫療即使靠醫療券及保險,每月最少要200元,其他開支即使「慳到盡」,每月仍要約近萬元支出。

以Angela的例子,由於她擁有一定資產,基本上與普通長者生活津貼無緣,若她全額100萬購入年金,每月提取5,300元年金計,夠每月開支一半左右,等到70歲可收取1,345元生果金,每月就合共有6,645元。

根據年金計劃,女性至少要約15年零8個月才能「回本」,比男性長1年多。她就認為:「都無話對女性唔公平嘅,哈哈,最緊要係唔需要我去諗投資情況係點。」而且計劃由政府包底,「見過之前雷曼咁多公公婆婆坐晒喺街(請願),(政府年金)已經係好好嘅選擇。」

Angela坦言「而家100萬喺香港其實唔算係咩錢」,以現時樓價難以做首期,仔女亦已「上車」,「當然仔女有(置業)需要緊係幫佢哋先,但調番轉,我第日同啲仔女一個月少攞五千幾,如果將啲錢用番喺佢哋仔女身上,幫助會好大。」

「我自問唔係一個好叻計數嘅人,有好多方式賺更加多錢,但我無嘅時候,呢個係一個比較穩陣嘅做法。」Angela表示,知道不能依靠政府年金作生活開支,只能視作補貼:「唔好當佢係福利,當係政府幫你儲錢。」

她指惟一考慮的因素,就是怕年金利率跟通脹不掛鈎:「而家就話五千幾,但十年後五千幾都唔當係乜。」有指該計劃是「鬥長命」,「(回報)可以去到105%,唔好咁貪心,我哋求咩?穩陣係我哋而家惟一嘅諗法。」她笑著說。

記者:梁延宇

相關新聞: 鮮魚行榮休校長「退休金最緊要穩陣」

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載