蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月23日
馬上成為壹會員

經濟客艙:
有種財長叫姆欽 - Captain Cool

侵侵(右)愛鬥大同亂搬龍門,姆欽(左)總會跟侵侵唱雙簧,非常合拍。 資料圖片

香港有位「總會認同你的上司」嘅財爺,不解釋唔講你都識;花旗國有位「總會跟上司唱雙簧」嘅財長,他的名字叫姆欽,大家要好好學習佢英文名嘅發音。

姆欽周末跟侵侵合演美元唱雙簧,侵侵於專訪透露對聯儲局加息唔太高興,又提到強美元令美國經濟處不利。姆欽出席阿根廷舉行嘅二十集團國峰會前,又有專訪指密切監控人幣滙率走勢,睇睇中國政府有冇操縱滙率,將人民幣轉弱情況納入《國際經濟和匯率政策報告》。

隔晚侵侵又喺社交網貼文,重申不滿歐元和人民幣持續貶值,削弱美國貿易優勢。呢個時候姆欽喺二十國集團峰會舉行前又同傳媒吹吹風。首先,要為主子撲熄火頭,重申侵侵對美元睇法,無意出口術干預滙市,也絕不干預儲局貨幣決策獨立性。

姆欽同侵侵合拍度,絕不可以低估。當美國有一位愛鬥大同亂搬龍門嘅總統,也要有位智勇相當嘅財長配合。姆欽為侵侵強美元言論解畫,自去年特朗普上場後曾出現過,姆欽解畫能力一次比一次出色。侵侵對美元嘅意見,唔係想針對儲局嘅獨立自主性,而係唔好忘記侵侵係美國總統,又係一名地產商人,梗係日日睇實息率走勢啦,咁又點會唔關心美元去向先。姆欽呢招身份互換概念,跟主子處理國際問題時亂搬龍門絕對有得揮。

地產商人侵侵也懂得利用傳媒同媒體影響力,喺貿易問題上借力打力。中美貿易談判陷入僵持局面,美國利用獨家專訪向中國及其他貿易夥伴國拋一拋浪頭,也有一個比貿易戰嘅訊息令大家更擔心,想打出貨幣戰呢隻牌,強調係想打,並非真係打。

侵侵不理總統身份都要話儲局加息刺激美元走強,影響美國貿易優勢,確實弱美元對美國更有利,起碼維持美國出口業競爭力。儲局繼續加息進程,係刺激美元上揚一個重要因素。同時貿易戰開波後,逐步見到資金回流向美股同美元,也很難令美元維持弱勢。美國要喺二十國集團峰會舉行時候擺擺姿態,派姆欽跟英、法、德、加拿大同日本傾傾數,亦為美國及中國貿易僵局,爭取更多有利條件。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載