› 選擇地區
三藩市
紐約
洛杉磯
其他美國地區
香港 台灣 北美
 
2018年07月27日

中環在線:頻頻現身 純官健步如飛 - 李華華

同兒子鄭志剛(圓圖)齊齊現身股東會嘅純官,講嘢中氣十足。

周大福(1929)主席鄭家純舊年初中風,休養一半年後,上月忽然現身業績會,畀咗個驚喜大家,噚日周大福股東會,純官再精靈咗,會上全程主持大局,會後又健步如飛咁快閃,果然係有排都唔使退休。

「身體幾好 樓市幾好」

記得純官上月出席業績會,間唔中有兩聲咳,會後亦有人傍住走,噚日佢就中氣十足,冇咳亦冇口乾要飲水。股東會舉行咗廿分鐘,會議議程主要決議派發股息、重選董事、核數師等等,全部獲股東大比數贊成通過,會上亦冇小股東發問,純官輕輕鬆鬆就走得。
睇番純官連同管理層一排14人坐喺台上,身為「總指揮」嘅董事總經理黃紹基坐喺純官旁邊,第三代接班人鄭志剛就隔開幾位董事坐側邊。
華華見純官精神唔錯,以為佢會自動留低同傳媒傾兩句,點知純官從後門離開,打算快閃。
佢見記者追訪,面露微笑,邊行邊話自己身體幾好,問佢點睇樓價,佢就「吓」咗一聲,停咗大約幾十秒,再細細聲講:「樓市都……幾好呀,我諗唔會再跌」。但由於真係太細聲,加上純官邊行邊講,冇停落嚟,真係冇乜在場記者聽得清楚。不過唔緊要,見純官健步如飛,大家都替佢高興。

李華華
mailto:LiWaWa@AppleDaily.com


LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載