› 選擇地區
三藩市
紐約
洛杉磯
其他美國地區
香港 台灣 北美
 
2018年08月02日

冰說聰明:真係恭喜你呀岳少 - 青冰

麗新發展主席林建岳。 資料圖片

麗展(488)兩個月前宣佈全購豐德麗(571),青冰在本欄都有撰文討論,話作價1.30元係比殘價更低的價錢,因為較NAV折讓八成啊,正常都冇人會沽畀岳少吖。當日青冰就指出,去年2月豐德麗曾以0.62元配售2.48億股,如以全購價1.30元計,已經賺一倍,而豐德麗長期都冇乜成交,趁這個時候沽貨畀岳少,都合情合理,2.48億股當中,只要有2億股沽畀佢,麗展就可以持股過半,正式將豐德麗納為附屬公司,合併財表喇。
上星期終於公佈全購的結果了,獲得2.31億股接納,佔發行股本的15.51%,麗展因此持有52.44%股權,達成要約的條件,全購變成無條件,終於完成任務,我真係恭喜你呀岳少!至於仲有冇後着,日後便知。咦咪住,青冰之前話有2.48億股喎,現在得2.31億,係唔係分析錯咗呀? 當然,不是內線人,冇可能得知究竟沽貨的是否友好人士,亦唔可能知道沽貨者是否就是當日配股接貨之人,但只要畀啲心機搵蛛絲馬跡,或者可以看得更清。
豐德麗在去年2月配股,數量是2.48億股,當日的配售代理是結好證券,CCASS顯示,結好證券的確在2月7日那天多了2.48億股,合理吖。自此之後,結好證券在豐德麗的交易唔算頻繁,當中只有一次2,500萬股射走。來到豐得麗公佈全購變成無條件之前,CCASS再次有大手變動,兩天合共約有2.3億股離開了結好證券,咁這個數字跟接納數字的確相當接近,如果用常理推測,是配股承接人接納了全購。
同兩個月前的結論一樣,若要改善市場對你的印象,搞少啲小動作,專心為股東爭取回報,相信有助改善嚴重折讓。不過華資老細可能會話:who cares?慣咗用以前嗰套做事,好難改啊,又或者博股東善忘囉。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載