› 選擇地區
三藩市
紐約
洛杉磯
其他美國地區
香港 台灣 北美
 
2018年08月03日

中環在線:白武士叙福樓打救永華麵家 - 李華華

永華麵家原址已租出,將會搵新舖重新開張。

香港老舖小店買少見少,好多老字號都不敵昂貴租金而結業,不過有麝自然香,好似位於灣仔、早前宣佈將於本月底結業嘅永華麵家,獲同樣係本港老字號嘅叙福樓(1978)識英雄重英雄,收購其香港、澳門及新加坡註冊商標,意味永華唔單止唔使執笠,仲分分鐘可以衝出香港,到澳門、星洲開分店。

相關新聞:【竹昇麵重開】永華與叙福樓聯手開店 未能承諾仍以人手製麵?

打動第三代傳人教秘技

永華被評為香港五大雲吞麵家之一,於2016年獲頒米芝蓮最超值推介,招牌美食包括鮮蝦雲吞麵、南乳豬手麵、桑寄生蓮子蛋茶。叙福樓冇透露今次交易作價,但可以保留本港傳統美食,香港人又有口福,幾多錢都值得喇!
叙福樓主席黃傑龍喺facebook話,聽到有70年歷史嘅永華麵家要結業,感到太可惜,「這是100%地道的香港雲吞麵,不是廣州南下香港的,我真係好希望可以保留這個品牌,更加希望可以保留他們的傳統美食工藝」。於是搭路搵朋友介紹,「幾經努力終於誠意打動」,先得到永華麵家第三代傳人張婆婆把呢個70年招牌同傳統美食嘅製作方法全部傳授畀佢。
不過,永華麵家原址已租咗畀人,所以都係會如期結業,黃傑龍話一定會把永華麵家延續,即係會另覓地點重新開張喇。出錢又出力,難怪網民like爆,話「到時開張一定撐場」。

李華華
mailto:LiWaWa@AppleDaily.com


LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載