› 選擇地區
三藩市
紐約
洛杉磯
其他美國地區
香港 台灣 北美
 
2018年08月08日

智取大市:反彈撈好定沽好 - 晉佳

近30年港股裏面,就算乜嘢熊市都好,跌夠半年總有個反彈浪。 資料圖片

上期講到,個股單日反彈幅度,要遠超之前個股單日嘅2至4%跌幅,先算係具意義嘅反彈力度,近期跌得深嘅教育股、物管股,如新高教(2001)、雅生活(3319)單日急彈能夠收復之前3日陰燭,力度算頗強。
有貨幾時甩手?冇貨撈唔撈好?不妨將策略統一化,以周一收市價作為止蝕價,如果市況繼續彈,但你手上隻股仍衰到潛低過周一收市價,證明係超弱勢,你同佢分手合理不過。若然今日勁彈過後,隨即見光死,A股斬倉潮仍陰魂不散嘅話,集體跌低過周一收市價,弱到咁一樣要避。
如果大市同持貨嘅股價一直冇跌穿周一收市價,或許值得一直持有整個8月。人行參事盛松成講明人仔保7,美國徵2,000億美元中國貨25%關稅亦難以喺8月尾公眾諮詢順利過關,呢兩方面消息短期內難以將後市質低。現階段持貨,係博8月冇其他方面嘅重大壞消息。
即使博8月反彈,策略上仍以增長股較秤先,一嚟為可能博失作兩手準備,跌市往往以增長股較硬淨。加上8月踏入業績期,增長股業績出現驚喜嘅機會,亦會較周期性股份為高,更值博。近30年港股裏面,就算乜嘢熊市都好,跌夠半年總有個反彈浪,睇吓歷史能否重覆。

晉佳
http://fb.com/advanceguy1
本欄逢周一、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載