› 選擇地區
三藩市
紐約
洛杉磯
其他美國地區
香港 台灣 北美
 
2018年08月23日

恒指7月至今跌4%
貿戰無阻美股破頂 港股料持續跑輸

【本報訊】美股標普指數前晚再創歷史新高,帶動港股昨升174點,收報27927點。雖然近日恒指已連升四個交易日,累升827點,但自7月中美貿易戰開打後,港股與美股走勢明顯背馳。7月至今,恒指累跌4%,標普則累升5%。有專家認為,港股將持續跑輸美股。
記者:李芷珊

相關新聞:拆局:股更傷 科技股前景堪憂

豐盛金融資產管理董事黃國英指,港股表現差是因為人民幣弱勢,「舊年港股升咗好多,拉返起步位有咁高,都係因為北水,嗰陣時開始冇咗北水,冇咗個主力嘅支持,咁所以冇北水就冇咁高喇」。他指6月份港股跌勢加速,是與人民幣同步,「人民幣當時貶值,加速嗰陣時我哋先跌得急」。

蘋果帶起美股氣氛

他認為美股強勁,是蘋果公司帶起了整個氣氛,「破咗成為股王之後,啲人由有頂好似變到冇頂咁,美股都係嗰幾隻大嘢帶起,其他嘢跟上。」他認為,美股最終都會較港股強,「雖然可能有啲短暫嘅時候,港股復蘇得快啲,但最終港股都係會跑輸番。」
騰祺基金管理投資管理董事沈慶洪表示,港股表現差,最主要因為受A股表現不理想而受影響。他指,中美貿易戰導致股市下跌只是一個藉口,「就算俾你徵關稅徵到5,000億都好,5,000億貨品計25%稅率,其實講緊都係千幾億美金,計個GDP比例唔高嘅」。

內地水緊利淡股市

他指真正原因是「內地錢水緊」,在環球股市中,內地和香港都是表現比較差,「始終內地企業部份近年都發咗啲美元債,美國加息都影響咗,加上內地又去槓桿,形成資金比較緊張,資金比較緊張嘅時間,好自然貿易戰個因素會成為藉口,大家好自然會沽貨,又冇咩新錢入返個市,個市就調整。」
沈慶洪又認為,當內地的財政和貨幣政策寬鬆,企業營運資金增加,基本鏈改善,便會令市場轉好,但需要比較長的時間。他表示,美股強是因為美國經濟確實比較強,加上息差關係,「好多時會揸番美元,揸住美元好直接會揸番美國資產,所以變咗佢嗰邊創新高。」他認為,內地對港股影響多於美國,「港股好多時係跟A股走」。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載