蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月07日
馬上成為壹會員

財經專題:東亞告別藍籌 業界欷歔

「世界大咗」,不一定像黃子華廣告所言,「存在感大咗,連遺憾都少咗」。對下周一(10日)正式被踢出藍籌股的東亞銀行(023)及舵手李國寶而言,大與細,這一刻或許有更深刻的體會。
記者:劉美儀 黃佩琳 陳家恩

相關新聞:華資行褪色紛賣盤

上世紀初到30年代,由家族控股的華資銀行或銀號相繼誕生,曾是金融市場的中流砥柱,為香港經濟發展貢獻,「廣東幫」賓架時勢造英雄,獨領風騷,但回首已是百年身。有資深銀行家及分析員總結,時代改變了市場規模「大咗」,新經濟冒起挑戰舊板塊,加上內地市場拖累令業務失色,以往的華資龍頭行如東亞「自然慢慢變成細咗」。

中國業務失色 曾錄虧損

併購潮亦令銀行資本多元化,難以再用昔日純家族控股的華資行概念界定今日香港銀行佈局。但證券界相信,失了藍籌不等於失了天地,東亞市值龐大加上李家光環護佑,被敵意併購的可能仍然甚低。
見證不少本地華資行放盤易主的資深銀行分析員、海通國際股票研究執行董事陳昔典亦難免欷歔:「對家族銀行的確係有種情意結,作為唯一藍籌家族銀行股,東亞被剔出成份股,某程度係幾可惜嘅結果。」
東亞「失藍」,他指多少與本身表現有關,近年因內地宏調影響,東亞中國業務失色,前年更錄得虧損,但恒指公司換馬,亦反映成份股組合要更加凸顯新經濟在中港市場的動力,「從排位上佢唔係(成份股)最低,有啲地產股市值比東亞仲小」。不過屬舊電池的金融成份股在恒指佔比已很大,有銀行、保險及券商,「故惟有剔出東亞」。
以「志同道合」之意命名、成立逾40年的香港金融業志同會(前身香港銀行同業志同會),是由上世紀華人賓架及華資行老闆發起、聯誼交流及幕後游說發功的一個同業組織。會長吳連烽指,「離開成份股唔等於間公司有問題……只係時代唔同咗,上市公司都2,000幾間,各種資本嘅機構喺香港上市,尤其金融機構規模越來越大,東亞喺咁樣嘅銀行整合入面,係其中一間以前帶領嘅華資行代表,𠵱家慢慢規模上變成好似細咗」。
吳連烽指,隨着銀行併購迭起,資本成份多元化,「好多間華資行角色變咗,好似永亨(現稱華僑永亨)、永隆或早期嘅恒生(011)……華資行呢個概念亦唔同咗,變成好難再純粹由香港家族控股稱呼,呢個係自然規律,最重要喺佢嘅根(營運主力)仲喺香港」。

相關新聞:財務表現跑輸同業

百年歷史 李家光環仍在

東亞是現時少數由家族管理的上市銀行,近年該行常被對沖基金施壓狙擊,「失藍」後下一步會否「失勢」?陳昔典認為,基金叫陣多屬短線行為,策略是誘發買家出手,「唔係自己出錢去收購」;東亞市值龐大,市場潛在的買家現已越來越少,加上人民幣走弱,內地未必鼓勵金融機構走出去大動作併購,故「東亞被收購嘅機會仍然會低」。東亞目前市值超過800億元。
立足本港百年的東亞銀行,有家族光環照耀,他說「李家喺香港同內地嘅影響力從無變過,人脈網絡唔會因為剔出成份股而改變」。中國業務雖困難重重,但只要東亞銀行改變營運模式繼續發展,仍具效益,「以往10年8年單打獨鬥,今後要同內地科網巨企合作」。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載