› 選擇地區
三藩市
紐約
洛杉磯
其他美國地區
香港 台灣 北美
 
2018年09月18日

大棋局:中國產權可圈可點 - Mr. Tregunter

中國對開放門戶有顧忌,想保證資產緊握在手,又得到市場化好處,產權問題可圈可點。資料圖片

內地輿論再次熱議公有制定私有制問題,這一點,同貿易戰有重大關連。共產黨建政後實行計劃經濟,所有嘢收歸國有,然後再派畀你,為之公有制。以前內地人唔使搵工,畢業後政府會安排你去唔同單位。玩咗幾十年發覺唔對路,於是鄧小平改革開放,釋放生產力。但中國係社會主義國家,唔好意思話自己改玩資本主義,就度個新名叫有中國特色的社會主義,即保留公有制,容許部份私有制。
咁玩法經濟上行時冇事,經濟下行,個個都知道要市場化先可以刺激經濟,而市場化必然係私有制。如果冇貿易戰,中國尚可以閂埋門自己趑趄躊躇;發生貿易戰就唔可以再拖,外資已準備打入嚟。簡單比喻,若外資銀行可以隨意在中國開檔擴張,內銀唔知有幾多間要摺埋,因冇人會用落後服務。
貿易戰旨在撬開中國缺口,讓外資更自由、更大規模地進出中國。當外資可以大規模進場時,產權,就刺中了上述制度。特朗普選擇這個時候打貿易戰恐怕並非巧合,適逢中國處於第二次改革的十字路口,若外資能此時入場,將可買起、掌握相當多重要產業。中國如果企硬,一旦經濟爆煲,屆時再侷住開放只會更賤價。

難分公有制或私有制

面對如此形勢,輿論再度熱議中國應該行公有制定私有制。被外界稱為劉鶴副手的全國政協經濟委員會副主任楊偉民提出,唔好糾纏於公有制定私有制,應該淡化所有權,強化產權。乜嘢意思?用香港樓市為例,一講你就明。香港買樓係leasehold,你可以自住、放租、轉讓、抵押,但塊地唔關你事。地契有年限,到期業主需要續租,要唔要補地價到時先知。即業主只係二房東,只係向政府租層樓返嚟,點用隨你。業主有產權,但並無真正的所有權。不同於freehold,freehold係你買咗塊地,塊地就屬於你,沒有年限問題。
楊偉民所提出的,主要針對農村土地改革,及國資委對國企放權等問題。然而上述概念假如用喺其他地方,例如企業股權上,會點樣?新自由主義、華盛頓共識的歷史教訓,令中國對開放門戶有顧忌。想保證資產緊握在手,又得到市場化好處,產權問題可圈可點。
內地樓市早已實行,業主控制了產權,不代表擁有土地。表面上你有產權,好似私有制,但你冇真正擁有該資產,其實係公有制。就好似《國產零零漆》橋段,表面上你以為佢係隻鞋,其實佢係風筒,問你死未。

Mr. Tregunter
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載