› 選擇地區
三藩市
紐約
洛杉磯
其他美國地區
香港 台灣 北美
 
2018年09月18日

操盤手札記:鷹美躺着也中槍 - 割柑人

一個惹火嘅廣告,令Nike運動服代工兼布料研發夥伴鷹美,股價受壓。互聯網圖片

颱風「山竹」襲港,新聞所見,有人死守家園,有人追風逐浪。情況就如股市,熊市當前,有人死不止蝕,有人狗衝博反彈……只能講句,祝君好運!
中美貿易戰陰晴不定,港股反彈斷纜,周一回吐1.3%。恒指1月見頂以嚟反覆向下,形成下降通道,目前通道底喺26000水平,通道頂喺30000水平,中軸則喺28000水平,亦係短期下降軌阻力位,升穿呢個位先有望扭轉弱勢。後市阻力重重,博反彈宜見好即收。
近排美國運動品牌Nike有個廣告,引起網上爭議,更引發特朗普粉絲杯葛。事緣Nike月初為品牌口號「Just Do It」面世30周年,推出一系列廣告,起用因不滿警察槍殺黑人,喺美式足球聯盟(NFL)比賽奏國歌時,拒絕站立致敬而單膝跪地抗議嘅球員Colin Kaepernick。
Kaepernick嘅抗議行動,發生喺2016年賽季,當時佢被唔少美國愛國人士譴責,包括球迷、贊助商、警察工會,仲有特朗普!賽季結束,Kaepernick亦成為棄將。佢嘅遭遇,正體現Nike句廣告標語「Believe in something. Even if it means sacrificing everything.」
廣告出街翌日,Nike股價一度大跌3.9%,但四日就收復失地。Nike喺美國勞動節假期(9月2日至4日)網上銷售大增31%,舊年同期只增17%。相信事前已做好民意調查,計過得失。Nike逆流而上無事,佢嘅運動服代工兼布料研發夥伴鷹美(2368)就無咁好彩。
鷹美喺印尼有廠,早前又喺越南買廠,以為避過中美貿易戰;點知大客Nike廣告惹火,雖然網售不減反增,但市場擔心特朗普今後會針對Nike以討好粉絲,拖累鷹美股價受壓。不過,鷹美本年度已接滿定單,盈利同派息可望增加,現價股息率9.5厘,具防守力。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載