› 選擇地區
三藩市
紐約
洛杉磯
其他美國地區
香港 台灣 北美
 
2018年09月19日

財經人物 :自爆身家近600億
蔡志明發達靠Snoopy

蔡志明,人稱「玩具大王」,旭日國際集團創辦人兼主席,玩具廠起家,後來涉獵地產、醫療、鐘錶等;名車、遊艇、豪宅亦數之不盡,但旗下業務無一上市,是不折不扣的神秘大富豪。他實際身家一直是個謎,但不少上市公司周轉不靈,都會找他求助,包括康健(3886)創辦人、股壇大玩家曹貴子,亦向他借救命錢,卻令外界以為蔡志明是曹的金主,他勞氣說:「我有五、六百億身家,點會為賺一千幾百萬去害人呢?我一年都捐幾千萬啦,冇理由㗎嘛!」

撰文:陳雪蕾
攝影:馬泉崇 林寶益

相關新聞:生命中有兩個重要女人

訪問當日,是晚上七時,蔡志明安坐在其頂層辦公室,吸口煙,看着佳兆業(1638)的股價。甫見到記者,即問「食飯未呀?」記者的「未」字甫落,他隨即吩咐秘書到大埔陳漢記外賣幾碗牛腩粉、幾碟小菜,「呢間好出名,我有時做得太夜,都會叫外賣食。」
蔡志明現在要甚麼,出句聲就可以,應該沒有甚麼是買不到,但他小時候的玩具,只有打波子和拍公仔紙,「睇美國電影有好多玩具咁過癮,已立志大個要做玩具。」1966年,當年19歲的蔡志明,中學預科畢業,成功考上多倫多大學,準備出國留學之際,卻見媽媽「眼濕濕」,「當時哥哥阿妹都出晒讀書,媽媽好想我去,但我去埋就得番佢一個人,(我怕)返到屋企冇人同佢傾計。」於是,蔡志明放棄升學,在媽媽介紹下,到玩具廠做銷售員,主力接洽外國生意,「做咗兩年,入去嗰時有12個客,我走嘅時候係72個客戶。」
期間他發現做玩具代工生產(OEM),有更大的賺錢潛力,於是自立門戶,「好辛苦,由25歲到40歲,我都未玩過,日日就喺公司做嘢。」每天日做夜做,直至遇上一隻狗──當時紅遍美國的「史諾比(Snoopy)」。
蔡志明成功取得史諾比的代理及生產權,設計了多款史諾比玩具,「將佢綁喺降落傘、放喺滑板上,做到個客賣到呢,日夜不停做,真係賣到人山人海,越做越大,連續做咗十年八年,賺咗好多錢。」

97年後大舉投資地產

旭日現時在內地有兩間玩具廠,有約4.5萬名員工。蔡志明說,時至今日,旭日在玩具業仍保持一哥的地位,惟利潤只是以前的五分一,「以前做50億元生意,可以賺10億,現時做500億先賺到,比例辛苦好多。」因為內地競爭激烈,即使與客人合作關係長久,難免要用價錢競爭。
但他表示,玩具是他的興趣和始業,一定不會放棄,應該投資的會繼續投資,例如為了節省成本,把大部份工序自動化,「公司有班同事好好,一齊做咗三四十年,冇錢賺都要做。」
因此,旭日1992年開始多元化業務,蔡志明說「要搵易賺錢嘅生意」,故1997年後大部份投資都在地產,目前旭日大部份盈利來自地產業務。
蔡志明是潮州人,為人疏爽,遇上「架己冷」資金有難,他二話不說伸出援手,「問我借錢,我唔會理佢嘅原因,但我會收返息㗎!」得他相救的,包括佳兆業主席郭英成,去年3月蔡志明斥資約5億元增持佳兆業股份至5.21%,令停牌近兩年的佳兆業得以復牌。披露權益顯示,蔡志明去年9月減持股份至4.47%,毋須再作申報,故不清楚他現在是否仍持股。

相關新聞:與特朗普做朋友 不做生意

慨嘆新一代機會很少

蔡志明是六、七十年代搭上香港經濟高速增長快車的典型例子。他坦言,新一代想在香港白手興家很難,「肯努力機會唔係冇,但少囉,早十年八年大陸就好多機會,周圍都係機會,只要你做啱一樣嘢,肯苦心去幹,機會都好大。但香港好多都已飽和,就算開間餐廳,開完冇耐都頂唔順,生意唔好固然做唔掂,生意好業主又加租,香港真係好困難。」

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載