› 選擇地區
三藩市
紐約
洛杉磯
其他美國地區
香港 台灣 北美
 
2018年09月19日

收市閒情:災後另一宗荒謬事 - 千頌C

香港話晒係國際金融中心,竟然冇一個政府部門去估算災後嘅經濟損失! 資料圖片

山竹走了,雨過天清,但香港人就即時上演一套震撼全球嘅真人騷──返工!
可能係我孤陋寡聞,真係未聽過一個城市,經歷災難滿目瘡痍,大批市民第二日竟然逼上街頭,跨過一個又一個嘅障礙物,竟然係為返工?令我更嘆為觀止事情係,香港假假哋都係一個世界舉足輕重嘅國際金融中心,但原來香港係冇個部門,去估算災後嘅經濟損失!
話說前日正當香港人千辛萬苦去搵方法返工,大家怨政府唔敢停市,係因為唔想加大經濟損失,咁同事S就心諗,「你咁怕損失呀嘛,就問吓你點損法!」
最直接,就搵商經局啦,點知當局就話,「唔知噃,你搵政府新聞處問吓啦。」好啦,咪打去新聞處囉,新聞處竟然話:「你要問商經局喎!」咩料呀?OK,咁咪再打,最後得到商經局回覆,係幾咁令人沮喪:問過晒其他部門啦,政府冇人會就山竹計呢條數,就算之後,都一樣唔會。
Well~北望神州又點呢?中國方面,據各地民政部門彙報統計,截至9月17日12時,廣東省14個市66個縣(市、區)共458個鄉鎮受災,直接經濟總損失42.49億人民幣。至於廣西,就大約係5,175萬人幣。
你可能話,「中國泱泱大國,計係好正常呀!」咁不如一齊去一轉澳門呢。冇錯,山竹嘅經濟損失數據係未有,但澳門真係有部門專責去計呀。澳門統計暨普查局今年初公佈,幫「天鴿」修正風災對澳門的經濟損失,直接及間接損失合共125.45億澳門元。
至於香港呢?咁多年都真係冇聽過政府部門,去就重大事件評估經濟損失(坊間係有人評估嘅,最出名係當年雷鼎鳴話,佔中累港經濟損失11,000億)。即係咁,如果連統計都冇,邊個sector出事最大都唔知,下次touch wood有更大災難時,要善後上來無數據支持,更加無從入手。
至於香港經濟損失條數,政府冇,唯有靠學者。經濟學者徐家健教授就估算,冧樹爆窗等的維修費幾億,前日大家被困港鐵等返工嘅時間,都有幾億,加加埋埋大約10億,至於背後推算個基礎係咩?佢就用咗政府辛辛苦苦,搵專人去估算嘅數據──高鐵「慳時間」會帶來幾多經濟效益。

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載