› 選擇地區
三藩市
紐約
洛杉磯
其他美國地區
香港 台灣 北美
 
2018年09月27日

冰說聰明:信摩笛不如靠自己 - 青冰

現時仍然有接近九成大行看好吉利,同年頭相差不大,不過吉利股價就已經跌咗一半。資料圖片

大摩作為大行,長久以來對港股,都有一定影響力,在上一星期,青冰留意到佢哋啲分析員先後三次吹奏摩笛,值得留意。首先他們帶頭唱好本地電訊商,原因係1010及CSL加價;跟住就係將吉利(175)目標價劈至10蚊,籲減持;星期五將舜宇(2382)目標價減兩成至95元。總結三次的成果,的確帶動了本港電訊股上揚,吉利在報告見光之日,又真係再創52周新低,舜宇在周五開市初段一度跌半成,再穿90蚊。
相信戰友都知,雖則叫做投行,但唔同行業的分析員,總會良莠不齊,總有後知後覺的報告及評級。以吉利為例,青冰在彭博資訊check番,大摩在2017年6月才調高評級至持有,那時股價已炒至14蚊,目標價係15蚊,去到10月升級至買入,當時股價已經27蚊喇,目標價跟番貼啲,至30蚊,股價在11月22日見頂,為29.80元。不過兩個月後又轉軚為持有,目標價冇變。直至上星期,一舉將目標價劈至10蚊,並呼籲沽售。舜宇上月公佈的業績令全城嘩然,大行紛紛調低評級,回看大摩六月才調高目標價至220元,業績後調低評級至持有,目價價減至120元,上星期再劈價20%,也帶來短暫震動。
青冰明白,有時某些個股,可能由於商業關係,也盡量避免作出沽售的評級,吉利後台有多硬大家應該明白,現時仍然接近九成大行係看好的,同年頭相差不大,不過股價就已經跌咗一半,究竟係全行分析員都冇料到,定係其他原因,自己諗。不過最頂癮係大摩劈價至10蚊之後,股價上周連升三日,累升16%,究竟佢係明燈定係專登呢?相信佢自己先知。
大行報告,對於中小型股份仍然舉足輕重,尤其是市場仍未充分理解的公司,隨時點石成金,但如要靠佢捕捉藍籌股的轉角位,都係信番自己分析啦。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載