› 選擇地區
三藩市
紐約
洛杉磯
其他美國地區
香港 台灣 北美
 
2018年09月27日

Hea富生活:買樓投資係咪時候? - 郭釗

現時買樓投資,想再大升一兩倍的可能性極低。 資料圖片

上兩星期寫過一篇文章叫《用家入貨時機到》,觀乎近日將軍澳LP6和中國發展商在掃管笏的新盤,前者折實呎價萬二蚊起,後者一萬有找,五百幾、六百萬買到兩房新樓,聽落好似時光倒流十年咁,收到不少朋友查詢,問係咪買得過。喂,大佬,條題講到明「用家」喎,但提問的大部份是投資者,最少有一層樓揸手收緊租,見到樓市出現微調即時又想入市。講真有一千幾百萬cash的香港人真的很多,唔信你睇吓新盤展廳條人龍,以及個個星期在酒店舉辦的外地樓展銷會,山旮旯咁遠的東南亞三四線國家賣三四千蚊港幣一呎,香港人都猛話抵買。
相比之下,香港樓反而更抵,起碼開價接近附近二手市場,泰國柬埔寨越南馬來西亞,賣給香港人那些新樓,貴同區二手樓二至四倍不等,其中有些國家的市場透明度甚至低絕全球,外地人要查根本無從入手。
說回香港,投資和自用根本不相同。投資追求兩個目標,年輕資金小,應尋求資產有突破性爆發以改變生活;中年本金較多,追求長遠穩定性回報以確保往後退休質素。買樓自用,多為初上車年輕人,應選擇上班方便,最好有地鐵接駁。不要貪圖新樓會所金碧輝煌,而走去只靠巴士出入的地方住。
若果是買樓投資,想再大升一兩倍的可能性極低,現時收租回報平均兩厘多,買地產股收息都有三、四厘,一樣可以做槓桿,而且套現容易交易成本低,其實睇好樓市都唔一定要買實物吖。
說到投資,老友徐緣為我新書寫序都講我是「投資界百彈齋主」,小弟欣然接受,總相信真正值得投資的東西要找不易。

郭釗
http://fb.com/heaology.edu
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載