› 選擇地區
三藩市
紐約
洛杉磯
其他美國地區
香港 台灣 北美
 
2018年10月30日

金手指:地產經紀係瘟神時 - 孫柏文

地產廣告嘅用字,有時連財演都自嘆不如。 互聯網圖片

作為盡職嘅財演,孫柏文係鍾意周街行時,停喺啲地產代理店櫥窗出面望,從中偷師。我多年來用嘅「一注獨贏」、「不問價追」,泊喺佢哋嘅「窮人恩物」、「好過打劫」等旁,即見高低。

當然,如果大家同我一樣,都有呢個企喺度望地產代理廣告嘅習慣,相信歷年來都被「見到你衝出來」嘅經紀,攞咗whatsapp聯絡號碼。

不過,除非你係真用家要買賣樓,好多時收到啲經紀嘅spam訊息,除咗block,唔知點做。

我係咁樣指示啲spam人經紀:「現價買樓真係冇興趣,不過如您他朝見到啲有十厘租金回報嘅樓放盤,就一定要記得搵我。而如果您再寄嘢畀我,關於一啲冇十厘租金回報嘅盤,無辦法,我會block您。」

不過地產經紀十個有九個都會唔理我嘅說話,照spam,迫我block。淨番嗰一個,就見字回:「孫生,十厘?唔好玩啦。如果你有咁嘅盤,不如你介紹番畀我!」

我就會話:「唔知呢啲十厘盤幾時出現,不過我明白您點解會咁答。我只希望,當周街啲物業有十厘租金回報時,您仲做呢行。到時如果仲做緊,全世界會當您係瘟神,不過我承諾,我到時一定當您係財神咁看待。」

之後,whatsapp就會出現兩個藍剔,佢哋就唔會再覆我。點解呢?

孫柏文
獨立股評人
http://fb.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載