› 選擇地區
三藩市
紐約
洛杉磯
其他美國地區
香港 台灣 北美
 
2018年10月30日

操盤手札記:搭國家隊順風車 - 割柑人

過去一周,阿爺傾力救市,A股閃現國家隊入市維穩身影。 資料圖片

港股向來要睇中美股市面色,中美近排面黑黑,港股難免面青青。市大摩估計標指一兩個月內會再跌8%至10%,高盛則睇淡出現聖誕升浪嘅機會。事實上,無論中美企業,季績確係走樣。

周一,A股受股王茅台(滬:600519)季績跳樓式放緩拖累,跌2.2%;港股就靠過氣股王滙控(005)季績略好過預期撐住,升0.4%。過去一周,阿爺傾力救市,A股閃現國家隊入市維穩身影,但周一唔多見影,唔通諗住放寬回購頂得住。

國家隊係乜水?話說2015年中港股市大時代,7月爆發股災,中國證金公司打本5隻基金──招商豐慶、易方達瑞惠、嘉實新機遇、南方消費活力、華夏新經濟托市,被視為國家隊。不過,5隻國家隊基金,今年第二季開始減倉,剛發佈嘅第三季季報,更披露已經清倉!

國家隊沽貨離場,係咪跌市元凶?截至6月底,5隻基金持倉合共315億元人民幣;截至9月底,則全數清倉。換言之,上季一共沽走315億元股份,而且國家隊嘅貨,權重股居多。不過,睇股市表現,滬指第三季只跌0.9%,以低位計則跌7.1%,相比今個月已跌9.9%,未算好凶。

國家隊係咪唔再救市?據高盛早前起底,國家隊規模唔止5隻基金。該行將當年參與救市嘅金融機構,如中國證金公司、中央滙金公司等都計入,共有22隻基金,截至6月底,持倉合共1.5萬億元。另外,國家隊亦喺ETF駐紮,滙金曝光持倉達685億元,證金則近19億元。

對中國嚟講,股市穩定有經濟同社會意義,國家隊點會唔再救市。事實上,本月兩次大跌市,都見國家隊身影。想搭國家隊順風車搵食,可參考其資產配置,當中最重倉嘅依次係銀行、能源同保險股。不過,高盛提醒,國家隊干預活動只會帶來三個月功效。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載