› 選擇地區
三藩市
紐約
洛杉磯
其他美國地區
香港 台灣 北美
 
2018年11月01日

冰說聰明:敢斬騰訊就跑贏 - 青冰

騰訊去年全年升了114%,雖然今年大跌,但很多基金都唔敢換馬,寧願攬炒都唔可以獨自跑輸大市。資料圖片

今年市況咁悲情,恒指累跌17%,若果你跑贏大市,屬難能可貴,不過又公平一點,去年恒指靚爆,雖然今年差勁,兩年加埋仲係有12%進賬,若果你加埋又跑贏,咁已經夠資格KO大部份基金經理。

若稱去年為騰訊(700)年,應不為過,全年升了114%,短短三個月已經升了兩成,逼使唔少基金醒覺及就範,相信很多基金經理連《王者榮耀》係乜都未知,已經要焗住追貨。我們經常呻表現好廢的強積金,你可以去睇吓他們在12月結時的持倉,不難發現只要是中港的股票基金,清一色最大持股都是騰訊。

基金經理最怕的就是跑輸大市,騰訊咁癲更加令佢哋唔敢動搖倉位,大家的信念就是最多咪攬炒,係喇,今年得償所願。騰訊爆煲,壞消息接二連三,正係考各位功夫之時,可惜青冰睇返9月底的數據,那些5星評級的基金,騰訊仍然為最大持股。青冰當然深明每個基金都有其限制,不是貿然話cash is King就可以清倉,但這十個月以來有咁多反彈機會,大把時間減持執倉換馬,可是就不敢斬騰訊。

上文說的5星基金,根據最新資料,現時大概蝕15至20%,跟恒指相距不大,但凡事總有例外,某港股基金,現時只輸一成,算係大幅跑贏,佢都有買5%騰訊的,不過相若比重的仲有維他奶(345),及新加坡上市的牛奶國際,今年分別上漲24%及12%。此基金去年亦有43%回報,兩年拉勻都仲贏三成啊。

青冰看到的,不只是他扑中維他奶,而是看得出個基金有用心揀股及作倉位部署,相信你敢買維他奶,也不敢揸咁重吧。投資者畀舊錢你玩,就係信基金經理專業揀股,如果你又係買返騰訊內銀內險藥股,同盈富基金(2800)又有何分別?

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載