› 選擇地區
三藩市
紐約
洛杉磯
其他美國地區
香港 台灣 北美
 
2018年11月08日

冰說聰明:延禧攻略受惠股 - 青冰

《延禧攻略》令佘詩曼在內地人氣爆升,連她做代言的美容公司也得益。互聯網圖片

雖然近年青冰都已經冇煲劇,但從耳聞目睹都感覺到,今年最強的大中華神劇,應該係《延禧攻略》,該劇7月在愛奇藝上線,播到大結局錄得150億次播放量,佘詩曼在內地的人氣亦隨之而爆升,阿佘因此名利雙收,而有佢做代言的,應該亦得益不少,其中一個受惠股,應該係必瘦站(1830)。

佢哋六月底時公佈全年業績,大賺近兩億,換言之,現時歷史市盈率約11倍,來自香港的收入佔65%,中澳部份佔35%。不過中澳先係最賺錢,稅前利潤1.5億,佔集團六成,咁都可以理解嘅,香港人工貴租金高,經營成本遠高於內地吧。

現時中港澳,美容纖體已經唔係主流,取而代之的是無創醫學美容,雖說國內美人不少,但正如經濟數據一樣,相信都有唔少水份,影相就話可以P圖,但若然先天不足,都係要使多少錢去微調一下,是為大勢所趨。其他的唔講,就延禧內的令妃,經常被內地網民指她削骨磨腮,究竟有冇,戰友可搵張相自行判斷。公司現時在內地佈局主要在北京、上海、深圳及廣州,全部是一線大城市的高級購物商場,盡吸消費力強的內地女性,所以毛利率超高,加上嫻妃人氣咁旺,宣傳效益更值得期待。

在過去12個月,必瘦站曾兩次發盈喜,兩次翌日都裂口上升,而到正式公佈業績,仍然會給予小股東驚喜,六月底時就係派高息,結果兩次正式出業績,翌日又係再裂口向上。以往盈喜前一天,都見唔到有春江鴨手影,股價冇異動成交亦低,執筆之時,未有任何通告,但股價已破位而上,疑似有鴨,因為今月正是必瘦站公佈中期業績的月份,十月初披露過半年銷售合約按年大幅增長39%,引擎就是上文提及的醫學美容,有理由相信發盈喜會是指定動作,趁未有公佈要搵位入喇。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載