› 選擇地區
三藩市
紐約
洛杉磯
其他美國地區
香港 台灣 北美
 
2018年11月19日

貼地風管:年輕人,你值幾多錢? - 鄭發

年輕人最首要嘅投資就是自己,尋找一樣真正喜歡的專業。
資料圖片

好多公司嘅價格賬面比率(P/B ratio)隨時有十倍八倍,原因是賬面價只以會計準則量度,很多時不能反映市值。股票投資者比較看重市盈率(P/E ratio),E指earnings,是公司的盈利狀況。但一間公司的市值,是取決於市場對該公司往後數十年盈利和派息狀況的預期。如果認為公司的盈利會快速增長,P/E表達就會很高。反之,P/E便跌到很低。

我已退休,有收息,無收入。假設我全副身家投進股票,收到嘅股息剛好夠生活,我嘅E就等於零,所以睇P/E無意思。要睇P/B,樂觀假設股票組合能夠追和通脹,我嘅P/B會接近1。因為將來我上天堂或下地獄時,股票組合的購買力與今天的賬面值差不多。

年輕人嘅市值係睇P/E,要做到高P/E,就要努力尋找工作上的真愛!就算俾你笑,我都要分享以下親身體驗。

當年做電腦sales,妄想透過高層朋友的關係轉行入「百富勤」。In我那位仁兄問我點解要轉行,我懶醒講咗幾個電腦行業嘅困難,佢一嘢KO我:「有挫折大X晒呀?呢度做仲X多挫折,到時你又戇XYY要轉行呀?你咁唔X受得挫折,就咪Y嘥我時間,真係鍾意呢行嘅人,就算幾X多挫折,都無X諗過轉行,你條X樣有無X諗清楚㗎……」

我無法記住他的大名,但真心誠意多謝佢,因為係佢鬧醒我,令我終於搵到我工作所愛,就是風險管理,無論遇到幾多挫折,仍然樂此不疲。

人生最首要嘅投資就是自己。識投,梗係投「一生最愛」:尋找一樣你真正喜歡的專業。不能怕錯、怕醜、怕瘀、怕煩;心態上要做到「佢愛唔愛我都無問題,但我肯定係最愛佢」!

我有好多舊同事,花錢花時間考會計、財務分析、法律等資格,卻幫不了他們升職跳槽,因為他們並未真正「愛上」這些專業。如果有位同事已獲取某專業資格,但工作上明明可以應用時,仍然戇居居唔出聲,要劃埋條腸咁問,佢先肯問一句答一句。另一位同事雖無專業資格,但興趣大,鍾意發問,肯主動去查證。你係上司,你升邊個?

年輕人,請努力投資在自己身上。去找你一生最愛嘅專業,並盡力儲蓄。儲到錢才有本錢投資,從風險管理角度看,年輕就是資本,承擔風險能力高,無論輸贏,「實戰經驗」已經是一項很好的投資。如何開始實戰,下次再講。
足本版請見「貼地風管」fb專頁

鄭發
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載