› 選擇地區
三藩市
紐約
洛杉磯
其他美國地區
香港 台灣 北美
 
2018年11月23日

屋苑故事:回憶無價 不談升跌
住開一城有感情

辛小姐在第一城長大,難忘當年在商場到處走的日子。

樓市吹淡風,作為指標屋苑的沙田第一城,昨再有兩房減價100萬元沽貨,呎價險守1.5萬元。藍籌屋苑亦出現劈價潮,記者到屋苑直擊地產代理劈價實況,但對同區街坊來說,不談樓價升跌,對屋苑感情不變,甚至靜待機會幫下一代上車或買多間收租。
記者:王者馨 李海澄

相關新聞:鎖車出名快 訪客小心

記者以顧客身份到沙田第一城睇樓,先向美聯查詢細價樓盤,預算約500萬元。代理隨即表示有約10個樓盤可睇,並指「𠵱家賣樓節奏快,可能今日傾緊,夜晚已經賣咗」。代理先帶記者看其中3個位於4期及5期的低層筍盤,其中最低價為485萬元的304方呎單位。
參觀樓盤期間,代理落足嘴頭,表示現時樓市「倒轉」,「以前業主臨門一腳可能要加20萬先肯賣,但𠵱家反而可以減幾萬」。

區內代理落重藥撈客

記者隨後向中原查詢細價樓最平價位時,代理開口即說:「買家議價空間大,可以再傾。」參觀兩個樓盤同樣位於4及5期,最平為480萬元的284方呎高層。「2、300呎細單位,以第一城最好,間隔實用」,代理推介單位之餘,亦旁敲側擊提議放租,並指成交後,放租價錢可達1.3萬元。參觀期間代理亦多次強調,不會帶顧客參觀凶宅及低層單位。

接着來到利嘉閣,地產代理即推介公司「獨家盤」,並指是私樓中較合理的價格,「呢個呎價等於大圍居屋」,出盡力留客,利嘉閣旗下最平細價盤為495萬元的304方呎單位。

作為新界區藍籌屋苑,沙田第一城的樓價升跌皆吸引上車客眼球,同區街坊對屋苑亦充滿感情。街坊王太結婚時,見沙田區發展不俗,決定由市區搬進沙田第一城單位,一住30年,更在這裏組織家庭。王太回憶說:「我結婚生仔都喺第一城,仔女都大,𠵱家做鄰居嘅保姆湊細路。𠵱家屋苑變化好大,特別係樓價,我結婚嗰陣上車,用20幾萬買一個兩房高層自住,單位唔賣,會留嚟養老,做祖屋算喇。」

「30年嚟沙田第一城都有大變化,特別係商場同街市,已經全面翻新,商戶係連鎖店為主。街市就好現代化,全部有冷氣。不過,以往喺中秋、新年嗰陣,商場都有攤位遊戲,又有好多活動好似猜燈迷,換到好多禮物,但係𠵱家冇晒。」王太續說。

「我住咁多年,最難忘係馬鞍山鐵路通車,當年商場有免費派馬鞍山鐵路嘅列車模型,係先到先得咁派,我見一班左鄰右里一大清早7點去排隊,見商場打咗好幾個大蛇餅,排到11點先開始派」。最終鄰居送了一架模型列車給王太,她至今仍很感謝該名鄰居,更將列車模型放在組合櫃內留念。

相關新聞:街市翻新勁加租 商戶難捱

街坊難忘童年食玩買

8年前在第一城上車的胡先生直言:「屋苑雖然樓齡有番咁上下,但睇嚟都仲好乾淨同整齊,而且商場喺大維修之後靚咗好多。我未諗賣樓,始終自己住緊,都會留番自住。」

在屋苑長大的辛小姐認為現時要在屋苑置業仍然艱難,只能等機會,「我對沙田第一城有好好嘅童年回憶,仲記得我同阿妹趁阿媽剪頭髮,我哋喺舊商場四圍走兼買閃卡、睇文具同抽啷啷嘅情景。仲諗起細個成日玩攤位遊戲,換咗好多禮物嗰份喜悅。嗰時最鍾意去『食之家』食魚蛋粉,不過間舖頭已經唔喺度」。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載