› 選擇地區
三藩市
紐約
洛杉磯
其他美國地區
香港 台灣 北美
 
2018年11月27日

大棋局:進入超級周期末段 - Mr. Tregunter

美國經濟如果在2020至2022年左右開始轉壞,而又處於大宗商品超級周期末段,就唔係普通經濟轉差咁簡單,而係蕭條。 資料圖片

G20峯會在即,無論是否有好消息公佈,都需要留意一個問題,就係關稅點樣處理。關稅令來貨價變貴,其實係變相托價。貿易戰的另一面,讓我們從大宗商品超級周期角度去睇。

經濟學家Jose Antonio Ocampo同Bilge Erten數年前曾發表一份報告,指由1865年開始,全球出現過4次大宗商品超級周期,第4次由2000年至今。大宗商品超級周期伴隨經濟泡沫而來,當經濟急速發展,大興土木,需求爆上自然就會搶貴貨,屬於需求帶動型通脹。美國次按爆煲前的買樓熱潮及中國有前冇後的基建擴張,係這一波大宗商品超級周期的重要推手。

然而隨住美國次按爆煲及中國經濟下滑,不少看法認為第4次大宗商品超級周期正步向末段。截至11月23日,CRB商品指數收市報179.6,距離2002年低位145並不遙遠;彭博大宗商品指數收市報81.22,亦非常接近1999年歷史低位76。兩個指數都差唔多回到第4次大宗商品超級周期起點。

2022年後慎防蕭條

早前提及,內地研究康德拉季耶夫長波周期的經濟學家周金濤,過身前預言大宗商品2015年見一次底,2019年會再見一次底,然後橫行熊市10年至2030年左右。油價近月急跌,但油價要同其他大宗商品拆開嚟睇,因牽涉美元萬劍歸宗第三部,這部份稍後再談。

另一方面,美國加息周期預計2020至2022年完結。經濟轉差,通脹下跌,先至需要減息刺激經濟。如果美國經濟2020至2022年左右開始轉壞,而又處於大宗商品超級周期末段,就唔係普通經濟轉差咁簡單,而係蕭條。所以我們將關稅抽離去睇,若G20峯會出現一種情況,中美有偈傾,但關稅不撤,咁就擺明係要托價。

油價同其他大宗商品頻率不同步,所以油價唔可以升太快,其他大宗商品唔可以跌太急。用人為方法扭曲價格,令通脹陰上唔好急上,目的係要拖長美國今浪加息周期。中美之間,明爭緩和,暗鬥加劇,係一場持久戰,如此美國加息周期不能太早完。

中國近年一改韜光養晦策略,因預見經濟有崩潰之虞,要由內部問題轉化為外部問題去維持統治;美國對華政策由引導轉為強制,因美國亦要面對萬一出現蕭條如何保持莊家地位不失。環球同此涼熱,時勢如此,非一人能左右。

Mr. Tregunter
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載