› 選擇地區
三藩市
紐約
洛杉磯
其他美國地區
香港 台灣 北美
 
2018年11月27日

財路:越秀地產殘爆有得諗 - 錢雋

越秀集𦬅董事長張招興(中)及越秀地產董事長林昭遠(右)。 資料圖片

今年內房企業喺傳統所謂金九銀十內房大旺時節,冷清收場,場內越秀地產(123)脫穎而出,10月銷售彈出,有得諗吓。

今年10月,越秀連合營項目合同銷售額,達到81.2億元人仔,同比大增156%,銷售面積近33萬平方米,同比增幅亦翻一番樓上。又計今年頭十個月,集團累計銷售額439億元人仔,已經完成今年目標80%,靚仔到痹。

又今年以嚟,喺內地持續政策緊縮下,總體內房銷情麻麻地,有擔心嚟緊日子,內房硬着陸。但咁睇,資本瓣數當中,A股已經貼晒地,若果內房爆破埋,內地經濟復元更需時,所以,估計內地會適度調整緊縮政策,內房有望向上彈。而美銀美林亦發報告話,大部份發展商同專家都認為,內房政策風險已見頂,係睇阿爺明年初或者幾時鬆手。

講番越秀,集團對口係廣州市屬越秀集團,牌頭夠晒照,而越秀單到今年6月為止,仲有560億元已售未入賬金額,連埋預售超過400億元人仔,保守啲計,亦可以安全過渡橫風橫雨期。

場內專業預測,集團今、明兩年預測PE 0.24元同0.27元,越秀現價1.40元,比今年3月高位1.94元累跌39%,兩年預測PE得番5.8倍同5倍。又仲吸引係,越秀今、明兩年專業預估PB 0.4倍,呢個水位,同之前金融海嘯期水平,已經差冇幾,越秀殘到爆。

越秀有調整,見跌到落短線橫行支持1.3元細細注,明年預測PE上番家陣6.3倍,都講緊要升34%到1.74元,有魚有肉。

錢雋
細價股專家
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載