› 選擇地區
三藩市
紐約
洛杉磯
其他美國地區
香港 台灣 北美
 
2018年11月27日

操盤手札記:受惠大橋真亦假 - 割柑人

港珠澳大橋通車滿月,平均每日人流近6.9萬人次,但車流只得約3,100架次。 資料圖片

今個月嘅壓軸戲「習特會」周五公演,不過,呢場壓軸戲唔係煞科戲,不妨買定花生,等睇雙方傾唔傾得掂數,先至再作投資部署。周一,滬股再跌0.14%,港股反彈1.73%。近排中港股市chok過林峯,貿易戰只係原因之一。

據《福布斯》講,中國經濟最大挑戰唔係貿易戰,係債務!雖然官方數據國債只佔GDP 47.6%,但非官方數據如國際金融協會數據則達300%。問題核心係:借貸人同放貸人都係政府!銀行只係代理。喺貿易戰衝擊下,政府鼓勵放貸,債務比重上升,隨時爆煲,難怪市場有戒心。

剛過去嘅周末,港珠澳大橋通車滿月,平均每日人流近6.9萬人次,同2008年可行性研究報告估算嘅5.6萬至6.9萬人次吻合;不過,車流只得約3,100架次,同估算嘅9,200至1.4萬架次相差66%至78%。畢竟貨運業唔同旅遊業,轉關口無咁易。

大橋通車前,概念股係威係勢,𠵱家又點睇?大橋受惠股,包括運輸股如粵運交通(3399)、珠江船務(560)、冠忠巴士(306),通車一個月,股價分別累升0.33%、3.98%、20.47%;另有旅遊股如香港中旅(308)、珠海控股(908),前者累跌4.5%,後者累升3.61%。

當然仲有濠賭股,六大濠賭股中,銀河娛樂(027)累升7.36%,其餘冇乜上落。此外,綜合企業股粵海投資(270)累升9.94%。齋睇牌面,冠忠贏晒,不過,集團月中剛發盈警,原因之一正係為港珠澳大橋業務初期投入巨額開支!升幅居次嘅粵投,反而更有睇頭。

粵投唔係單純嘅大橋受惠股,亦唔多受貿易戰影響。最為港人熟悉嘅,係賣東江水畀香港!單係賣水,已有穩定現金流;現時手頭現金達105億元。該股周一升2.29%,收15.16元破頂,走勢呈現區域突破。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載