› 選擇地區
三藩市
紐約
洛杉磯
其他美國地區
香港 台灣 北美
 
2018年12月14日

智取大市:上落市最大陷阱 - 晉佳

近期常見股價突破即見頂,所以喺上落市模式啟動之際,投資者等撈好過追。資料圖片

之前估計港股呈現上落市,12月走勢暫時符合原先假設。上落市嘅判斷係基於中美談判太多枝節,未貼近3月,都唔會有人願意太早應付可能嘅變化。而孟晚舟事件嘅市場反應,睇得出信心偏向薄弱,暫時未見形成升市嘅條件。

呢種上落市會為期幾耐?最快要去到接近3月、即係90日談判接近到期之時先完,估計有遲冇早,而呢兩個月內,有機會試多次10月低位24500附近。出年成年流流長,先定兩個月策略,然後見步行步冇壞。

前排搭港鐵由中環返堆填區,發現唔少散戶睇股票報價,話市場情緒好差?未算。可以預期嘅係,當中美談判出現好消息時,就會消耗買盤,然後有可能等新嘅壞消息,係典型消耗戰模式。

炒上落會點玩?睇一個典型例子,中海外(688)。由8月到𠵱家,中海外股價最低接近22蚊,噚日曾經突破28蚊就係最高,波幅未夠三成,但呢三成升幅,已經包含咗6個一浪高於一浪嘅高位,每次突破上一個短期浪頂之日,就係短期升市結束之時,即係每次突破追入都會摸頂,死未。今次未知係咪重覆過去趨勢,但呢種突破即見頂嘅模式,近期越嚟越常見,喺上落市模式啟動之際,等撈好過追。

晉佳
http://fb.com/advanceguy1
本欄逢周一、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載