蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年12月24日
馬上成為壹會員

笑到最後:KOL之又愛又恨 - 高明

不少網民也有閱覽KOL專頁。

2018年將盡,今年其中一個大趨勢,係KOL或專頁已漸漸取代傳統媒體為吸收資訊嘅渠道。當然KOL唔係今年先有,但人人都開個專頁,而觀眾普遍接納呢個模式,廣告商亦投奔呢個行業,今年可算係定型嘅一年。

大眾媒體演化至個人傳媒,係一個自然演變,因為社會成熟,發展初期大眾嘅口味較接近,發展至今,人以類分,口味分得更散。不過,有別於傳統媒體寫錯會被圈起恥笑,KOL寫錯則多數被寬大處理,呢個先係令高明擔心嘅地方。

曾幾何時,高明以為互聯網提升資訊流通,真理越辯越明。

本來有互聯網要查證資訊已好易,而KOL係社會上最叻用互聯網嘅一群人,理應輕鬆查證。令高明大跌眼鏡嘅係,社交媒體興起,真相反而係:隨便寫一啲冇查證嘅嘢呃like先多人理,至於資料係咪準確則只係小眾關心嘅事,反正免費睇個專頁,睇嚟又只係尋開心,資料準確嘅話故事性就會打折扣,不如直接作故事,而觀眾亦會照單全收。

呢個亦解釋咗,點解全球所有人都話特朗普善變講嘢冇句真,但當佢出個Twitter話貿易戰有轉機或要求聯儲局唔加息,個市會信到十足十,例牌挾一下勁,然後真相一出又再度被懲戒。

因為KOL已經取代咗過去嘅「專家」,代替觀眾思考,而KOL同觀眾嘅距離更接近,基本上已成為網友,信賴程度比起過去專家更有效,對廣告商同政權嚟講,無疑係天大嘅喜訊。

網上睇留言,雖然有小部份人覺得現況有唔妥,睇KOL距離事實越嚟越遠。但存在必然合理,事實係:大多數嘅人,係接受唔準確嘅資訊,對事實是否準確並無要求。

即使你話睇專頁同Twitter勿認真,但無可否認已成主流,配合收益嘅傾斜,趨向準確嘅資訊似乎越來越難經營,要有心理準備,假新聞將會遍地開花,幸好股市最終都係現實主導,唔滿意假新聞亂挾個市,不如倒返轉做獲利。

高明
http://fb.com/bigricetea

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載