› 選擇地區
三藩市
紐約
洛杉磯
其他美國地區
香港 台灣 北美
 
2019年01月03日

冰說聰明:劉華與One hit wonder - 青冰

劉德華

劉華因患流感而取消7場個唱,消息除了令粉絲心痛,也令持有黃牛票的人心急如焚,雖然這位「前民間特首」去年民望大插水,但作為演藝人劉華還是值得尊敬的。

在演藝圈,有個英文詞叫One hit wonder,意思即係有一個作品獲得廣泛認同,是年度代表作得埋獎嗰隻,但之後就無以為繼,漸漸被人遺忘,觀眾永遠只會記得那唯一一次。相反劉華就以勤奮過隻牛見稱,入行37年,唱歌拍戲最紅應該是十幾年前,雖然高峯期已過,但他仍是工作接工作,每年都交出水準,做人處事夠專業,極少會聽到有人話佢耍大牌,相信多年以來被人鬧得最多,應該是去年拍咗個政府宣傳片支持填海吧。

投資市場,相信每人都會試過One hit wonder,總有一隻係贏爆廠的,之後必然會飄飄然,經常同人分享及自high,但往後能否繼續創造下一隻爆廠,好睇閣下的功力及運氣,即使未能鋪鋪食清一色,持續作戰又久不久食鋪四五番,就靠閣下的勤力了。

2017年捉中騰訊(700)或手機股,贏爆廠係好應份,17年尾,應該無乜人認為自己只係One Hit啦,根本就是自己睇通時局,掌握慢牛的新常態。去年一個浪冚埋嚟,讓大家認識到自己有冇著泳褲,市況差最考大家功力及韌力,但耳聞目睹的,前年越贏得勁,去年越輸得甘,輸錢皆因贏錢起?

投資路上學劉華,就是要每年都交足功課,大起大跌唔難,大賭李嘉誠個個都識,每年平穩地贏一成最難,但往往被嗤之以鼻,前年贏一成肯定被人恥笑到面黃啦,去年仍然維持得到,才是真功夫大師傅。個個話今年投資市場唔明朗,根本年年都差不多,眾口一詞都話今年會好的,最後結果係點,在2018年大家都感受到了。

結論係,功課繼續做,勤力有回報,另祝劉華早日康復。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載