› 選擇地區
三藩市
紐約
洛杉磯
其他美國地區
香港 台灣 北美
 
2019年01月15日

金手指:貿戰完結有乜迹象 - 孫柏文

雖然中美高調行出來話貿戰「有進展」,但雙方都出晒名反口當食生菜,好難令人相信。資料圖片

今時今日,齋睇股市,都有唔少人隔幾日就用「貿戰紓緩」去解釋升市。如果你問孫柏文,我只可以話就算雙方高調行出來話「有進展」,我都唔信。因兩面都出晒名反口當食生菜。咁點先會信打完?一定要有某啲迹象出現,我先信。

首先,當然係美帝收兵唔打嘅迹象。要我估,一定要股市大插之餘,啲人信美股市跌係因貿戰。直到舊年年尾,其實市跌迫侵侵唔打,係有啲用。不過當聯儲局主席行出來淆底講兩句,股市已大彈,即係再跌就只因聯儲局又重拾收緊路,同貿戰無關。所以好難會見美帝自動唔打落去。

如果係咁,即係要強國自己投降。咁之前,我見啲有國際關係文憑嘅記者,話大陸又買大豆餵豬,係「釋出善意」喎。如果憑呢啲級數嘅招數就搞掂,入美大陸貨𠵱家就唔使日日交關稅啦!

美帝鬧強國有六項。其中一個,就係要大陸零補貼啲工業。而一樣奧巴馬時代已鬧嘅位,就係大陸造鋁業。最肉酸嗰單,肯定係十幾年前由零開始,不論鋁價幾低,自己成本有幾高,污染有幾嚴重,都不斷瘋狂增產至產能世界第一嘅宏橋集團(1378)。

老實,你可以跟港交所般信佢盤數。不過如果有日,國家突然攞佢開刀,佢忽然產能(唔係產量)大減,甚至爆咗。就真係國家釋出真.善意之時。一日宏橋繼續走現路,一日貿戰都未覺完。

孫柏文
獨立股評人
http://fb.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載