› 選擇地區
三藩市
紐約
洛杉磯
其他美國地區
香港 台灣 北美
 
2019年01月26日

財經專訪:大生銀行富三代賣珍珠奶茶

大生銀行第3代馬桂汶,在中環開設春陽茶事。

飲品店看似開一間賺一間,Dennis不諱言只要茶調得好飲,便是一門高利潤的生意,他深信有麝自然香,對某同行以排隊式飢餓營銷吸客嗤之以鼻:「點解要令到啲消費者咁辛苦,排兩三個鐘去飲一杯嘢?」

鍾情飲食業 合資開西餐廳

Dennis身為大生銀行家族的「富三代」,並無加入家族的銀行或地產公司,選擇在Marketing界打滾十數年,「爸爸同我講,需要啲乜,係要靠自己earn返嚟。坦白講首筆資金係要靠屋企,但之後賺到嘅再開就係自己嘅錢」。他對飲食業情有獨鍾,跟朋友合資創業,開過西餐廳,他指着自己肚腩笑言:「你睇我身形就知我鍾意食嘢啦!」

即使本港已有好多珍珠奶茶店,他仍然自信爆燈,不惜投資400萬引入有台灣群星拱照的春陽茶事:「大家都覺得珍珠奶茶店太過氾濫,但無論有幾多間,其實計數計得好,手搖飲品係成本低、利潤高嘅生意。」他又認為飲品店在經營者角度看,較開餐廳更容易,因為飲品可以跟配方去沖:「餐廳個命運係擺落廚師嗰度,某程度上你要受個廚師氣,佢劈炮唔撈,你就麻煩啦,但飲品只要照住formula,將同事訓練得好就夠。」

引入春陽茶事 「黑人」支持

首間分店選擇在中環,他坦言無論租金有多昂貴,每日只要500杯便可回本,若以此計算,每日開店10小時,即每小時要賣50杯,幾乎每分鐘便要沖一杯飲品,何況要賺錢,每日過千杯是「基本要求」,Dennis認為最快可以半分鐘沖到一杯:「前期預備得好,煮定黑糖,其實某啲飲品只係倒啲珍珠落去,一次過幾杯都得,其實講到尾,生意都係一個計數遊戲啫!」

香港數得出的珍珠奶茶店品牌已逾80個,近年中國最紅的「喜茶」亦已攻港,並開了兩間分店,作為輸在起跑線的新丁春陽茶事如何突圍?Dennis認為可靠品牌效應及台灣原材料作賣點:「台灣背後有黑人陳建州支持,前期宣傳已經慳咗一筆,同埋茶葉、黑糖,甚至檸檬都係台灣入口,相信香港人都係識飲識食嘅,所以點解要令消費者排隊3個鐘去等一杯嘢飲。」

他又想出以贊助形式宣傳品牌,例如將首日收益,捐給港安醫院慈善基金,另外走名人路線,店舖正式開張首日,有「黑人」陳建州等明星撐場,又在各明星演唱會贊助飲品等。他目標一年內開10間店,除了自營店亦有加盟商,計劃非常進取,他認為珍珠奶茶熱潮或者會冷卻,但芝士奶蓋類飲品因變化較多,有信心能持續經營。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載