› 選擇地區
三藩市
紐約
洛杉磯
其他美國地區
香港 台灣 北美
 
2019年02月01日

廣告經綸:送禮講噱頭兼講意頭 - 文廸晞

富途證券送出的一盒紅噹噹的啤牌及一大叠好贅手的籌碼。文迪晞提供圖片

年近歲晚,做生意當然要有噱頭得來又講意頭。

近期不斷收到很多不同品牌、生意夥伴送來的賀年禮品。最常見的自然是又膠又紙、燙金燙銀、有滑有唔滑、有閃有唔閃、大大細細的利是封;還有來自不同酒店、酒樓、餅店和自家製蘿蔔糕、年糕、黃金糕、朱古力之類。

So far最爆,莫過於富途證券送來的一盒紅噹噹的啤牌及一大叠好贅手的籌碼。同事見到都感到非常興奮,打算去親戚朋友屋企拜年時用來賭番幾手,發一下新年財,還打趣說不知是否可以去富途,當真錢用來買股票。有時,真的很佩服如富途這些品牌,一味唔信邪、去到盡,夠晒出位。還記得佢哋喺剛過去的聖誕節,出了一個極之另類,以「拎拎拎!聖誕股票闔家拎」為題的廣告。今次繼聖誕「闔家拎」之後,過年送籌碼,希望不是喻意搵佢哋買賣股票,猶如賭博,賭輸咗就闔家拎啦,認真耐人尋味,估你唔倒。

今個禮拜六就係年廿八,大家都準備洗邋遢。剛好收到來自髮型專家LaMod的護髮產品及coupon,迎新春來個「頭髮頭皮大掃除」,也確實有點噱頭。至於在芸芸眾多的利是封之中,每年我都特別喜歡海港城的設計,有好幾年送來的,至今依然原封未動。好明顯不是因為太醜樣,而是太靚唔捨得用。仲要好窩心,差不多每次都附上一個Clutch bag之類,內裏還有分隔以供擺放不同銀碼利是,方便實用。

記得以前,還會收到大量賀年曲奇餅,今年明顯少了一大截。很可能係因為消委會在兩星期前發佈對58款曲奇所做的測試調查,結果大部份不是含有基因致癌物,就是高脂高糖。今次真係大整蠱,早唔查,遲唔查,就係要看準時機,等各大曲奇品牌生產完成了要應付過年的龐大需求量之後,report一出,恐怕今次新年銷量,隨時插水收場。

文迪晞
mailto:heyadmen@gmail.com


heyadmen@gmail.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載