› 選擇地區
三藩市
紐約
洛杉磯
其他美國地區
香港 台灣 北美
 
2019年02月20日

收市閒情:環保紅色「跑車」幾時有 - 千頌C

香港1.8萬架的士,有三分一都車齡超過15年,但香港現時係冇設的士退役車齡。資料圖片

「紅色的跑車像是帶着神秘」,每一次你喺街截一架的士,就係一場賭博。昨日,我喺街頭,揮一揮手,想拉開車門第一架冚旗的來了,「去邊呀?」「九龍灣」「唔過海呀」。第二架,門都未掂到,佢就走。第三架,你終於上到,司機禮貌周周,點解?因為係用App Call嘅。

大約兩三年前,Uber大舉攻港,令唔少香港人覺得終於有出路,「我終於唔使受的士佬氣啦」。好景不常,的士業界猛烈抨擊下,政府高調拉人,結果Uber少咗好多車,貴咗好多啦。

利申,Uber同的士之間,我都係揀的士,純粹因為的士司機熟路好多。不過,政府既然咁支持的士業界改善質素,但我又未見佢支持到底。

話說,豐田旗下石油氣金豐4座位的士上年停產,本港代理商引入新款混能的士,即係話,未來的士車主要換車嘅,就焗換呢架混能的。不過,原先石油氣的車價大約26萬,新混能的就要32萬。「貴咗咁多,梗係唔換,整得就整啦!」

同政府朋友傾過,現時香港1.8萬架的士,有三分一車齡超過15年!香港現時冇設的士退役車齡,只要過到驗車,話知佢行咗廿年。與此同時,巴士行駛年期係不可超過17年;小巴、貨Van都有15年退役期限。到底係因為「紅色的跑車」硬淨啲?定係因為政府牙力唔夠牌主硬淨?

𠵱家要講為大灣區大局着想,中央公佈《粵港澳大灣區發展規劃綱要》就講到「強化區域大氣污染聯防聯控,實施更嚴格的清潔航運政策,實施多污染物協同減排,統籌防治臭氧和細顆粒物(PM2.5)污染。」𠵱家新車就出咗,仲要係混能,由環保角度出發,作為大灣區其中一個地區,為大灣區人着想,港府好似補貼貨VAN咁補貼又好,立例又好,推動的士車主換更環保嘅車,其實責無旁貸。

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載