蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年03月04日
馬上成為壹會員

極端天氣趨嚴重 近海未必好
林超英用氣象學揀宅 首選向南偏東

【人物專訪】港人生活空間狹窄,不少人夢想有坐擁無敵大海景的居住環境。不過,在天文台前台長林超英的角度,極端天氣越見嚴重,住海邊其實不是明智選擇,去年山竹襲港,杏花邨及海怡半島有辦你睇。林曾力數落地玻璃的不是,今次再加多腳,「唔好住咁近海邊」;而空氣污染,東西北都各有問題,「好嘅座向亦唔係座北向南,而係向南偏東」。
記者:黃詠茵

相關新聞:跨境污染物殺入元朗屯門

相約林超英到紅磡碼頭舊巴士總站訪問,甫見面他便說︰「嗱,住得太近海邊,風吹上嚟會潮濕好多!」回南天時相信很多香港人會明白。若果風來得合宜,其實可令家園冬暖夏涼,所以傳統有云,住宅座北向南最好,不過林超英解釋最好應該是向南偏東,「咁就夏天吹西南風都入到屋,而間屋向南,亦唔會太多陽光入到屋,令間屋唔會太熱,冬天太陽低一啲都有陽光入屋,間屋又會暖啲」。

風暴來襲 海岸線易水浸

林超英的家,正是附近的紅磡海逸豪園,一個市區臨海豪宅盤。山竹襲港時,屋苑都有不同吹爆玻璃等事故發生,他稱家園沒有意外發生,「我揀住內園,(樓層)高度啱啱好睇到樹林,由窗望出去就好似一幅畫」。

同屋苑的臨海單位,卻沒有這麼「好彩」。山竹襲港期間,紅磡最「出名」就是吹甩玻璃,紅磡碼頭亦受湧浪威脅,「呢度係追風勝地。如果山竹再近啲、再強啲嗰時登陸,海水有機會再升多兩米,水位已經到咗呢個位」,林超英指指腰間位置,若真有風暴潮來襲,「因為黃埔碼頭去到內街都係冇高山,完全係平地,估計(海水)可以去到黃埔街咁遠」。

他認為,九龍及港島的海岸很多是以前填海出來,當時預計打風時水位不會太高,到現在市區很多建築物都貼近海邊,「例如港島北面、由堅尼地城到筲箕灣,然後九龍半島南面,油麻地到尖沙嘴然後到紅磡,個海岸都係比較低,所以如果打風嗰陣風暴潮嚟到,呢啲海岸線都有機會受水浸威脅」。

相關新聞:全玻璃外牆食風兼難散熱

電錶房「失守」釀二次災難

打開地圖,看林超英所指的地區,不少都住宅林立,過去颱風襲港時亦是新聞常報的水浸熱點。林超英稱,氣象學關心的不止是風雨,還有二次災難,住得近海邊又住低層,風暴潮大到撲入家園;但住得高亦有問題,就如去年的杏花邨,海水上升後波及電錶房,令電力中斷,影響居民生活。

究竟住宅距離岸邊多遠才算安全?林超英指不能一概而論,但認為市民無論置業或租樓,都要觀察住宅與海岸有否相應距離,「如果打風,吹起嘅風暴潮會唔會威脅屋企安全?會唔會風大到開唔到窗?平時又有冇適當嘅氣流,令環境變得舒暢?呢啲都要留意」。

林超英的睇法顛覆大家揀樓概念,你可以信風水,也可以信這位氣象學家所言的「真風真水」。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載