› 選擇地區
三藩市
紐約
洛杉磯
其他美國地區
香港 台灣 北美
 
2019年03月21日

冰說聰明:鳳凰賣App為闖科創板 - 青冰

鳳凰衛視旗下在美國上市的鳳凰新媒體,公佈將以35億港元出售「一點資訊」的32%股權,呢單刁值得細嚼。資料圖片

鳳凰衛視(2008)的節目,戰友們應該好少睇,青冰都一樣,所以對隻股都冇乜興趣,直至早幾星期,佢旗下在美國上市的鳳凰新媒體,忽然公佈將以35億港元出售「一點資訊」的32%股權,才開始刨吓有冇商機。

鳳凰衛視近年發展令人失望,2013年年賺八億,2017年盈利縮減至2.8億,去年上半年仲要蝕866萬,所以親中央都並非靈丹妙藥,唔可以當飯食,去年9月鳳凰網多個頻道被整改,足足停咗兩星期冇更新,鳳凰新媒體大受打擊,致剛公佈的全年業績,錄得近920萬美元虧損。

本業就乏善足陳,不過單刁就可以細嚼。「一點資訊」這個內地新聞App都搞得唔錯,年頭做完融資之後,已劍指內地科創板上市,不過一直未解決VIE架構問題,唔拆就只可以上新三板,要拆除VIE就必須要境外股東割愛沽出股權。雖然早幾星期鳳凰衛視的通告中,沒有明言買家是誰,但相信都是屬於內地註冊的公司或基金吧。換言之,出售完成後「一點資訊」就可以闖科創板了。鳳凰新媒體此舉係成人之美,亦可能是國家任務,不過佢哋仲保留了5%股權,日後若炒到飛天,仲可以食尾糊。

鳳凰新媒體在周二業績後電話會議中,被多次追問完成出售後會否派息,管理層話都想跟股東分享成果,仍在考慮中。鳳凰衛視現持鳳凰新媒體逾5成股權,袋咗35億元,佔一半權益都已經17.5億元,現時鳳凰衛視市值只係48億,現價含金量極高,股價早前好興奮咁炒到上1.12,今星期回吐至0.88,整固應已完成。

單刁的deadline是在本周五,落實交易後就知真正特殊收益,有實際數字後相信就唔係呢個價了。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載