› 選擇地區
三藩市
紐約
洛杉磯
其他美國地區
香港 台灣 北美
 
2019年03月26日

大棋局:美國縮表有數計 - Mr. Tregunter

鮑威爾的新方案會郁聯儲局持債的duration,買短債,目的就係要將孳息曲線拗上。 資料圖片

聯儲局由2017年10月開始縮表,規模累進,分4個階段,第4階段每月減持國債300億(美元,下同)及MBS 200億,合共500億。現時處於第4階段。但聯儲局公佈的縮表規模係「上限」,即「每月最多縮咁多」。由聯儲局縮表開始至今,其實一直唔夠數。截至2019年3月,縮表規模上限係6,000億,實際上只縮咗5,345億。

聯儲局縮表計劃,原預計2020年完結,最遲也應不超過2022年。若按原計劃,至2019年末,縮表規模上限為9,000億;至2020年末,縮表規模上限為13,500億。但聯儲局3月議息聲明公佈,5月開始,國債只縮一半至150億,MBS照縮200億;9月結束縮減資產負責表規模;10月開始,雖然繼續縮減持有MBS,但將回籠資金再買國債,上限與縮減持有MBS一樣,即200億。

因此到2019年9月,新的縮表規模上限為8,250億,實際估計7,500億至8,000億之間。聯儲局縮表方法係被動式,即債券到期,回收資金,唔買嘢,令資產負債表自動波收縮。要注意嘅係,鮑威爾講咗MBS到期回收的錢會買債,而組合會更貼近市場化。聯儲局持有國債的duration為6年,比市場長,因金融海嘯後救市主力要壓長債息。因此聯儲局會改變持有國債的結構,縮短duration,會主力買短債。

中美之爭明年見真章

上星期美債出現3個月同10年期孳息倒掛,引起市場恐慌。由於聯儲局的縮表進程無論過去定現在,都係透明公開,因此市場一直會賭美國幾時經濟衰退。縮表加息周期完結唔代表即刻經濟衰退,但起碼見頂;減息先開始衰退。原本預計2020年左右縮表加息周期完結,而家縮表提前2019年完,係咪代表經濟衰退會提前?孳息倒掛即賭呢樣嘢。

所以鮑威爾的新方案會郁聯儲局持債的duration,買短債,其實就係要將孳息曲線拗上。貨幣政策央行大晒,故今年9月後美債出現孳息倒掛機會極低,聯儲局就係要市場唔好預期縮表完就會經濟衰退。

中美之爭,係一場決定往後誰領風騷之爭。中國以減少對美國貿易順差的進貢方式買時間,因賭你就快衰退;美國一改傳統,聯儲局受壓下幫手盡拖加息周期,因為要提供子彈,顯示冇咁快衰退。日中則昃,月盈則食,雖然扭盡六壬,2020年恐怕仍要見真章。

Mr. Tregunter
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載