› 選擇地區
三藩市
紐約
洛杉磯
其他美國地區
香港 台灣 北美
 
2019年03月26日

金手指 :喪屍企業襲全球 - 孫柏文

上世紀90年代,日本央行將利息大幅降下去推動經濟,結果衍生出喪屍企業。 資料圖片

孫柏文記得上世紀90年代,喺中學圖書館細讀《經濟學人》雜誌,睇到一篇講日本經濟嘅文。當年,日本央行已經將利息大幅降下,去推動經濟。不過《經濟學人》篇文就話,咁做係本末倒置,因將債務負擔減輕,只會令啲應該執笠嘅企業,成為喪屍般,令連健康嘅企業,都會因出現產能過剩、割喉競爭下,染喪屍病毒。

舊年,全球央行加息嘅加息,縮表嘅縮表,係威係勢。令投資者醒覺,知道好多喪屍企業,應該再借唔到錢,市場要來一次reset。港股、美股,喺舊年年尾大插插。點知到十二月,加息聲最響嘅聯儲局居然一嘢變鴿派,令美股勁反彈。上周四聯儲局再放鴿下,美股喺禮拜五到跌到趴街。令港股噚日都跌近六百。

數周前,歐央行話再玩印鈔,都見股市跌,當時我話過情況不妙。估唔到聯儲局加入合唱,都係咁。

我相信,未正式落實縮表完結日嘅聯儲局,應該好快行出來正式宣佈幾時唔再縮。而今年息口走勢,亦好快會有佢哋指導,到時希望個市會有番啲升市動力。而喺佢哋有呢啲動作前,要非常小心。

不過就算「加大力度」,再玩印鈔,結果都前車可鑑。日本之後啲喪屍企業,將日本所有資產類別(除一定會還嘅國債外)咬到一身殘。唔通真係永無重返正常、合邏輯、冇喪屍嘅世界?

孫柏文
獨立股評人
http://fb.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載