蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年03月26日
馬上成為壹會員

操盤手札記:折翼天使唔易搵 - 割柑人

折翼天使特點係有專利,港鐵做獨市生意,仲衍生地產金蛋,如果股價跟大市回調,可分段吸納。 資料圖片

歐美製造業PMI差過預期,資金流入債市避險,德國10年期及以下債息全線負息,美國10年期債息跌穿3個月債息形成倒掛。衰退徵兆乍現,嚇散歐美股市。周一,中港股市陪跌,跣低2%。恒指大幅低開形成下跌裂口,同3月12日上升裂口構成「島形頂」利淡形態,收28523,跌590點。短線支持睇3月8日「島型底」低位28200,以及250天線28100。周四期指結算、周五季結,好友或會頂住幾日。

上周有兩個全球排名出爐,一個係最幸福國家或地區,芬蘭蟬聯第一,香港排名76;另一個係生活費最貴城市,香港首度排名第一。呢一年嚟,香港攞咗六個全球第一:生活費最貴、樓價最難負擔、最自由經濟體系、壽命最長、智商最高、工時最長。幸福?真係遙遠!

其實喺金融市場,香港都有一個全球第一,就係新股集資額。不過,新股市場有量無質。舊年新股回報十年最差,集資1億美元以上嘅新股,首月股價平均跌6.2%;205隻公開招股嘅新股,以年底收市價計,近七成破底,即係十隻有七隻蝕本!

死剩嗰三成,有「集資王」鐵塔(788)。鐵塔係內地通訊設施供應商,近乎獨市生意,舊年8月上市,首日只係平收,之後潛水幾個月,年尾先喺炒5G概念下浮出水面。鐵塔潛水,一來係孭重債,二來係市況不就,但有獨市之利,折翼天使(fallen angel)復元就可再飛。

鐵塔炒咗咁耐,有冇其他折翼天使?本來上周有嘅,就係港鐵(066),通車40年嚟首度撞車,但冇撞散股價,埋單倒升。沙中線醜聞、四線齊冧、列車相撞、機鐵停駛,統統無礙,皆因鐵路係獨市生意,仲衍生地產金蛋。折翼天使特點係有專利,若港鐵跟大市回調,可分段吸納。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載