› 選擇地區
三藩市
紐約
洛杉磯
其他美國地區
香港 台灣 北美
 
2019年05月14日

【大棋局】中國偷雞 美國晒冷 - Mr. Tregunter

中美大協議越近尾聲越多反覆,但今次應該係最後一次,下個月相信完場。 資料圖片

貿易戰談判最後一刻,被中國偷到雞。當大家都預期談判要完結時,中國想修改部份早前協議內容,結果特朗普馬上加中國出口到美國產品的關稅。中國偷到雞嘅地方,係美國加徵關稅後,消息指美方同意還可以有一個月時間傾。即係話,中國摸到特朗普底牌,應該係有價講。

內地媒體一改近期對貿易戰冷處理的方針,鋪天蓋地回應美國加徵關稅。言必中國經濟冇問題,出口佔中國GDP比例越來越低,中國自信金槍不倒,美國將損失百萬計工作崗位,美國家庭開支會大增……阿哥,真係冇問題就唔使傾協議。

特朗普則一貫我做得好,美國數據靚,加關稅夠正。其Twitter發文表示美國同中國貿易每年損失5,000億(美元,下同),美國每年只賣1,000億貨到中國,中國要為價值2,500億美元商品付25%關稅,關稅收到的錢會流入美國……阿哥,真係咁正就直接抽關稅唔使傾。

下個月料完場

中國雖然此刻偷到雞,惟接下來要面對兩個後果。其一,中國最後反手,試到特朗普應該有價講,貿易條款上容或有寬限處。只係嚟緊一個月談判,美方對中方只會更加不信任,就算貿易條款可鬆章,監察機制反而會加碼。其二,特朗普雖然想達成協議,但是否必然無其他選擇,不一定。事關由幾十年前特朗普便一直強調,美國對中國等國家的貿易關係不平衡,美國要強大,要企業回流美國。

如有做廠的朋友應有體會,外國畀大訂單你初時好好搵,一段時間後,若貨主以斷單逼你減價,只有硬食。因已擴充到一定規模,需要接一定量的訂單方能維持。中國作為最大規模的世界工廠,最怕係斷單。關稅一旦不撤回,廠商慢慢會侷住撤離中國。中國現時經濟數據未仆直,係因為廠商未到絕望處。鴻海郭台銘早前表示參選台灣2020年總統選舉,即反映處於中美夾縫中生存的大廠家,意識到事態已逼近眉睫,需要在政治上有牙力,否則隨時成為炮灰。

《賭神》配樂響起,中美代表恤髮大褸入場。習近平話我牌面一條蛇,未必輸;特朗普話其實我係同花順,夠薑你就博。雙方都話自己煙士底,但叫對方先開牌。偷雞只能偷一次,下次對方自然有防備。雖然大協議越近尾聲越多反覆,但今次應該係最後一次,下個月相信完場。

Mr. Tregunter
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載